梅斯利亞今季有出色表現。(Getty Images)
曼聯上場英聯盃8強以3比4不敵熱刺，副選門將比恩迪亞難得擔正把關，但表現欠佳，成為輸波罪人之一，加上呢位土耳其國腳打算離隊，英國《太陽報》指紅魔鬼計劃簽入英冠球隊列斯聯門將梅斯利亞，接替比恩迪亞。
比恩迪亞自從上年夏天由費倫巴治加盟曼聯後，一直長坐冷板，至今各項賽輸僅4次披甲，更加未曾喺英超上陣，令佢意興闌珊，加上上場英聯盃嘅慘淡表現，進一步增加佢下月冬季轉會市場重開離隊嘅可能性。
因此，曼聯開始物色新2號門將，並睇中梅斯利亞，現年24歲嘅梅斯利亞2019年由羅連安特加盟列斯聯後成為主力，並有份出戰3季英超賽事，累積唔少經驗，曼聯簽入佢可以「即食」。
呢位身高1米98嘅法國「長人」今季英冠有12場保持不失球，成為球隊現時排聯賽第2位嘅功臣。由於奧拿拿屬於曼聯必然正選門將，如果梅斯利亞成「魔」，恐怕上陣時間會非常少，加上列斯聯有望重返英超，紅魔鬼要說服梅斯利亞來投，並非易事。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
