廚藝擔當Ada眾望所歸成湯圓主廚
有睇過VIVA的同居企劃「VIVA Medium Rare House」的話，很輕易就發現Ada是廚藝最了得的一個，就連雞煲都煮到。今次要煮湯圓，三位隊友毫無異議推舉她做大廚，指她是家裡的廚娘、廚藝擔當。正式開始之前，Carina、Macy、VALC在討論到底要煮幾多分鐘、薑應否去皮、滾水落糖還是凍水落糖等等，Ada沒有插嘴，見大家討論得七七八八，她問隊友想講究還是快捷，眾人都一致同意要快捷，Ada於是一秒開始廚藝小教室：「如果快嘅話，就全部『嘩！』一鍋落晒，等佢浮面就可以食得，但係如果你講究啲嘅話，就可以開水，滾咗佢先，煮熟咗之後先至再分開煮糖水。」眾人恍然大悟：「哦～～」
公司不定期抽查體重 用奇招避得就避
有Ada主持，煮湯圓一定冇甩拖，等候的過程更可以慢慢跟VIVA傾偈。經理人霍汶希對旗下藝人要求甚高，要她們定期磅重，講起公司會否禁止她們吃甜品，VALC說：「冇話唔俾嘅，我哋都會食。（唔使體重管理？）重咗咪減返囉，冇重到就照食。」Carina在YouTube節目中常常吃零食，但她立即指著Macy的方向：「哎呀，最近嗰一次我冇俾人話肥㗎！俾人話肥嗰個係第二度嘅人……」Macy自爆：「你嗰個手勢真係呢……因為我最近一次返公司，就俾Mani見到我，我出現同佢Say hi，佢話入嚟睇吓而家幾重，我話唔得，我頭先飲咗杯咖啡，我要即刻去個toilet先！公司個toilet係通嘅，我喺呢邊入咗去，喺另一邊出咗嚟，跟住佢捉唔到我。」
同居個半月 相處很多地方仍有待磨合
VIVA早前過完個半月的同居生活，更被安排四個人住一間房，節目開初她們坦言不團結，相處上有很多需要磨合的地方，同居後感覺又如何呢？Macy說：「我覺得而家都仲有嘢要磨合嘅，我哋純粹係有進步。我哋日常工作嘅時候都會有好多意見不合嘅時候，我覺得我哋可以搵到更好嘅方式去相處，做家務嘅部份真係有需要進步！」Carina覺得要磨合的地方不同，一開始是日常生活習慣的分別，Ada要整齊、Macy要乾淨，自己跟VALC則是比較放飛自我，不過隨著眾人監督下，Carina自言都多做了家務。VIVA的同居生活每周可回自己老家的時間非常有限，而且鏡頭24小時都錄影著，她們不諱言過程中會很攰、很辛苦，會掛住家人，也會有想要私人空間的時候，但回想起來也是一個很新奇的體驗。
回顧出道半年最難忘演出 四位答案完全不同
今年是入行後第一個新年，VIVA很開心可以在工作中度過，覺得是新一年的好開始。回顧入行以來最難忘的一次演出，四位竟有不同答案，Macy認為是「903籃球賽」上的啦啦隊表演，她留意到四人在學習新技能是都有不同反應，「譬如VALC好怕高，但係佢又可以喺表演嘅時候克服到， Ada就係，佢全程……皺眉大王嚟㗎。每一個人都幾恐懼啦啦隊呢件事，但係每一個人都有佢哋自己嘅方式去克服，Carina就係長期大嗌！（VALC：你都係！）我都係，唔好意思，所以我就喺呢一件事裡面發現，我哋四個都係好鍾意挑戰，我覺得印象好深刻。」
平時是Rap擔當的VALC就透露自己在某次School Tour期間，唱到一半發現Tube Top滑落，險些走光，無辦法之下她突然消失台中，跑入後台整理衣服，「佢哋三個去Carry《DTR》呢首歌，因為啱啱未去到Rap，到去到Rap嘅時候就發現我唔喺度，跟住我哋親愛嘅Carina就代我去唱我嘅Rap。」Macy接話：「我哋都有唱！純粹係因為我唔知你唔見咗，心諗……把聲唔同咗嘅？」Ada最難忘的是出道首個演出，那是澳門的《WAVEFest水上音樂節》，四人要在360度的四面台表演，而且有Runway，Ada說：「第一個表演嚟講，係好大嘅挑戰，但係嗰一次嘅表演之後，都豐富咗我哋自己嘅經驗，原來我哋都可以handle到。有經歷過咁樣嘅舞台，我哋先知道有乜嘢要繼續去調整，或者點樣先可以繼續好好籌備一個表演。」
Carina則認為非《叱咤》莫屬，當晚VIVA勇奪「叱咤樂壇生力軍組合金獎」，有機會表演，她表示：「係我哋四個第一次面對咁多觀眾，因為你知道嗰日係直播，會有好多家庭觀眾，或者完全冇聽過我哋嘅歌、完全唔知我哋四個係邊個嘅人去睇我哋嘅表演。我諗大家應該都有諗過，攞咗金獎上去一定要做得好好睇睇。同埋下面都有好多前輩，真係會望實你哋，認真聽你哋唱成點跳成點，所以我覺得嗰吓有啲壓力得嚟係好爽嘅，終於都可以俾人見到我哋四個係點樣嘅人！呢樣嘢對於我哋四個嚟講應該係一個幾好嘅……應該係一個幾難忘嘅經歷。」而最後，VIVA對新一年的展望是希望出慢歌，VALC預告：「唔係希望，我哋已經計劃緊，因為始終上年三首歌都係快歌，都有跳唱，想搵返一首係表演嘅時候可以企喺度唱歌畀大家聽，Please期待！」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
