陶大宇在當地的夜場表演，一抵步已獲總統式招待，有人列隊歡迎送花及房車接送，其間有多名疑似軍人在旁守護。當晚大宇一連唱了多首「飲歌」《倒轉地球》、《愛你一萬年》、《唱這歌》等，雖然語言不通，但無阻「師奶殺手」的魅力，依然好受歡迎，現場逾千觀眾興奮大叫，氣氛熱鬧！
陶大宇在香港機場接受傳媒訪問，他指當地人並非大家想像般恐佈，他說：「好多朋友問候我，搞到好似好得人得人驚咁，其實之前我都去過幾次，有朋友喺呢度做生意，打咗個底。」他指當地人其實好和平和善良，續說：「嗰邊朋友都講，叫我哋同大家講吓，其實呢邊唔係咁得人驚，咁恐怖。係兩個地域、兩個地方，只不過聽到東南亞或者柬埔寨呢個字就敏感咗，其實唔係大家想像中咁樣，我知嗰邊咩地方，所以完全唔擔心。」
陶大宇表示自己是透露相熟中介公司聯絡接洽工作，他說：「唔係群組中介，係識得嘅中介，當地請我哋嘅老闆照顧得我哋好好，有嗰邊保安，啲制服我唔知點分係乜嘢介別保安，但一望就係知軍人，好安全！係咪總統式又唔係，但令你好舒服同好安全，由頭到尾貼心咁照顧你，令你好快樂開心。」有否到不同地方遊覽？他說：「都冇乜，去做嘢同食飯地方，去洗手間啦...去洗手間都會喺你後面（軍人）啦，哈哈。」
外人眼中是甘願冒險，問到酬勞是否特別豐厚？陶大宇說：「一般啦，哈哈，合理價，唔會特別多㗎，大家以為地方咁危險梗係收貴啲啦，哈哈，冇呢回事，如果係危險嘅你畀多多你都唔會去啦，唔關呢啲事，合理價錢。」
陶大宇亦大讚場館超大和超靚，千人場館全場爆滿，他說：「開心一件事，估唔到柬埔寨人都睇香港電視劇，當然配咗音，好多認得我，我都好詑異，護送我啲軍人都有睇我哋電視劇，都向佢哋敬一敬禮先，好開心，場面幾熱鬧。我都未唱過咁大類似嘅夜場，卡拉OK場，氣氛音響都好好。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
