Jeana四年前開始定居北京，本身在河北出生的她，那時突然想回鄉尋根，恰巧遇上疫情，就趁機多陪家人。不過這不代表她放棄香港的工作，新一年開始，她亦打算過著中港兩邊走的生活，多投放時間在香港的演藝工作。講到當初做𡃁模，自小夢想做空姐的她其實從未想過入行，純粹是誤打誤撞簽了一間模特兒公司，但那時期曾對前景很迷惘，覺得模特兒工作不安穩，也不知讀完書要行一條怎麼樣的路，「嗰時最擔心試過無啦啦停喺個馬路度，大馬路，啲車郁緊，踎喺度喊……」
昔日寸嘴人設只是照稿讀 要說人不是感委屈
原本做模特兒只是想賺外快，又覺得趁後生有機會就試試，後來有人介紹Jeana簽另一間經理人公司，順理成章入行做𡃁模。那時候被傳媒冠以「寸嘴𡃁模」稱號，難免影響了外界對她的印象；然而私下的Jeana並非如此，訪問當日她主動跟初次見面的記者握手，完了後又擁抱了一下，當然可能是她成長了，跟當日待人接物的態度自然有所不同，但至少令人感覺舒服有禮。Jeana解釋當時的寸嘴金句只是背稿，「嗰陣時嘅經理人係會覺得，咁樣你會令人哋留意到你多啲，咁嗰時細個，唔識㗎嘛，完全都冇接觸過呢一個行業，經理人話乜咪乜囉，即係完全係一張白紙。」
她說那時候出活動，答問題都未搞清前文後理，公司叫她講什麼就講什麼，「你完全唔明自己做緊啲乜嘢，都唔明對方想點，亦唔會識去過濾任何嘢，咁但係呢個就係青少年囉。」而當中最委屈的，Jeana不諱言是要她說人不是，「呢個我真係麻麻哋，總之我講出嚟我就覺得……我自己都有啲尷尬。」不少𡃁模到後來都不想再提當時的往事，有些人退出了娛樂圈甚至要求傳媒不要再報道自己的消息，但Jeana就不會覺得是黑歷史，反而視之為青春一部份：「我都想變返咁後生呀！」講到這段青春歲月是開心還是不開心比較多，她說：「我諗都有試過唔開心，可能呢個標籤嗰時麻麻地。」
曾有負面標籤 感謝家人扮無事免她難堪
眾多標籤之中，Jeana最抗拒別人說她是「花瓶」，「你可以當係一個讚美或者你可以當係一個貶低嘅詞，咁我覺得唔緊要，我要Improve嘅係我入面囉。」女人固然要保養，但Jeana眼中最吸引的女人是要有內在美、內涵，而這必需要靠足夠的閱歷使然，「其實你問返我鍾意以前後生啲嘅我定係而家嘅我，我會鍾意而家嘅我，非常鍾意而家嘅我！我咁難得經歷一啲嘢去到而家，我好珍惜而家嘅內在。」Jeana感恩以前所有經歷、所有人，畢竟人要經過磨練才會長大，不論以前誰叮囑她警告她不要怎樣做，但年輕時總全部當作耳邊風，到自己真正摔一跤才知有多痛，亦因此更懂感恩現在還擁有的一切。
Jeana是很疼錫屋企人的，以前睇過報道，她入行賺了第一桶金後，豪擲十萬送禮物給父母，就連親戚都一樣有份，問起家人當初會否不想寶貝女行性感𡃁模路線，她也承認確實如此，但無疑大部份年青人都是反叛的，不會把這些勸告聽進耳裡去。𡃁模盛行的年代，八卦雜誌仍然風行，那時標題比今日的新聞更要Juicy和辛辣，Jeana亦上過不少封面，嘗試代入其角度去想，被家人見到總有點不是味兒，她表示：「我覺得我屋企人好錫我，嗰時又冇面對面同我講，一啲都冇提。我覺得因為佢顧及我個自尊，顧及我嘅感受先會咁。可能尋日發生咗依啲嘢，佢第日好似扮冇嘢咁，但係一定會知嘅，因為新聞有㗎嘛，我覺得而家諗返轉頭，其實係唔想再令到你唔開心，或者唔想再令到你尷尬。」
曾因前路迷惘陷抑鬱 幸得前度翁子光帶出低谷
𡃁模熱潮很快便過去，要留低在這個圈必須想辦法轉型，Jeana當然都想，但始終她的角色是被動的，不是說想轉便轉，過程中她亦有諗過轉行，「喺我迷失嘅時候，我曾經有一刻想放棄，真係有諗過，咁辛苦喺度做緊咩呢？內心喺度掙扎，但係第日瞓醒又好似冇咗件事。」Jeana亦在差不多那段時期陷入抑鬱，她說覺得轉型方向好像有點不妥，自己希望拍成熟一點的電影，但回頭一看，路線好像愈來愈不對勁，情緒於是受困擾，有一、兩年都收埋自己，不想見人，「唔出街㗎，同埋好冇Mood㗎，應該話冇乜情緒囉，但係後面就⋯⋯開始好返。」
當時治好她的藥乃是一段戀情，對方拉她一把，將她從谷底救出，而這位戀人，就是前男友翁子光導演，亦絕對是其人生教練。Jeana說：「我平時唔出街，佢會帶我出去，重新用另一個角度去睇電影，或者喺電影方面嘅一啲見識。所以我覺得，原來好多嘢㗎喎呢個世界上，就冇專注喺自己情緒入面喇。」二人因為拍微電影認識，翁子光比她年長十年，見識一定更廣，甚至看透Jeana的內心深處，「佢觀察人係好細微㗎，佢懂得好深入咁樣去觀察一個人嘅狀態，或者佢本身個性格，咁呢個係佢強項啦，可能作為一個導演。所以佢對住我，我咪突然間覺得，『點解你乜都明我嘅？好犀利！吓，你明呀竟然？』對於佢嚟講可能好簡單，但係對於我嚟講，我會覺得『嘩，點解好似識你唔係好耐，但係好了解你，完全將你個底都挑埋出嚟……所以我覺得，感動。」儘管二人的戀情未能開花結果，不過Jeana仍對翁子光心存滿滿感激之情，二人至今還是很好的朋友。
Jeana予人的感覺較為硬朗、獨立，彷彿不是太容易能進入她的內心深處，實情是連她都不了解自己，「可能我20幾歲先開始慢慢了解自己，以前都好似，咦？我係咩人嚟㗎？到而家我明喇，我知道何珮瑜係一個咩人。（到邊個位知道？）經歷好多嘢之後。」只有經歷完困境、困難後再回頭看看從前的自己，才會得悉自己是個怎樣的人，她說：「你一定係喺不停嘅難關裡面，先會對自己認識多啲認識多啲，認識多啲。」不過對於當時所面對的是什麼困境，Jeana就只以「心靈上的困境」簡單帶過。
感謝伯樂英皇 老闆楊受成承諾幫手轉型
如上文所講，𡃁模很多都只是曇花一現，大部份跟Jeana同期的都已轉行，反而她到現在仍活躍於電影圈、有工開，總有自己的過人之處。Jeana認為最主要都是際遇，當中要多謝的便是英皇老闆楊受成及經理人霍汶希（Mani），「我覺得係公司囉應該係話，因為係佢哋，我所有嘢係不停向好嗰方面發展，基本上都唔係原地踏步，無論係快慢，但係一定係向上，所以好多謝。」她回憶與兩位伯樂的相識，是在2017年惠英紅獲頒金像影后的After Party上，沒多久大家就開始傾起簽約，「我記得佢哋好似講過，如果幫我做到轉型就好成功，我話我都想。」
跟成家班學武打及揸槍 又愛上古典舞
對於是否要比其他人花更大努力去證明自己，Jeana認為主要視乎有沒有伯樂，自己亦沒有刻意去做些什麼擺脫過往形象，始終這行很講求天時地利人和以至神助，她只能做好功課，期待到哪天可以開花，「如果我再去理咁多人哋嘅眼光，我自己活得好辛苦，不如我想點就點。」話雖如此，不過Jeana近年都有增值自己，在北京跟成家班學武術，又學古典舞，她說：「成家班武術館喺北京，所以我喺嗰度學啦，學一啲古裝嘅劍法、棍法，同埋一啲時裝嘅槍械動作。」
拒再做花樽 感謝陳木勝點名拍《神探大戰》
早前Netflix台劇《影后》大熱，講述娛樂圈女星面對的種種現實和苦況，不少圈中人都有捧場，Jeana亦有追看。劇中有位叫妮妮（陳庭妮飾）的角色，當初因幫家裡還債拍三級片出道，儘管私下是位單純的傻大姐，卻總被貼上了「脫星」等各樣標籤。即使她後來如何努力轉型，決心「把一件一件衣服穿回來」，甚至已獲得一些實力派女演員獎項，還是會有人用這段過去羞辱她。相比之下，Jeana沒有全裸，尺度當然不及妮妮般大，但確實過往形象都是偏性感，問她可曾有過這種發誓要「一件一件衣服穿回來」的時候，她大笑說：「咁我又冇除晒！我都係著泳衣啫，冇冇冇，咪……淨係想發揮演技囉，唔使話著（返啲）衫。」
以往Jeana拍過《喜愛夜蒲》、《鴨王》、《一路向西》等電影，都是比較情慾的類型，一旦定型了就難以撕去標籤，講到過往去試鏡或爭取工作機會時，曾否聽過一些評價，覺得她來來去去都是這種沒什麼演技的性感花瓶，她不諱言：「我諗應該嗰時某啲人都會咁諗。」但亦因此，她份外感謝陳木勝導演點名她去拍《神探大戰》，「我好多謝佢，同埋韋家輝導演。嗰陣時佢畀咗個造型睇，我話『嘩！咁激？短頭髮？』直情好似男仔咁，同埋要剃眉，但係我覺得呢個真係好好嘅機會，所以我扚起心肝去做呢樣嘢。」《神探大戰》中Jeana飾演劉青雲女兒，尾段演出令觀眾刮目相看，她憶起電影煞科後半個月，她仍未能走出，「我記得拍完一場車嘅戲，同啲Partner鬧交嘅，我隔咗一兩個禮拜自己揸車，一個人喺架車度，紅綠燈嘅時候成場戲做返出嚟，跟住啲情緒、眼淚出晒嚟。隔籬有架Van仔都停緊，上面有啲客，可能佢哋覺得我神經病。」
與影帝合作 最大得著是學到專注力
Jeana近年與不少影帝級人馬合作，除了劉青雲，還有《風再起時》的梁朝偉、《怒火》的謝霆鋒等，她從幾位身上最學到的是專注力，這亦是三位的最大共通點。Jeana說：「我從來冇見過青雲哥攞電話，無論6、7、8個鐘，等候嘅時候，都冇，佢係一個人喺度思考。Tony哥（梁朝偉）又係，佢會同人傾偈，但係佢永遠好似好集中去諗嘢，鋒哥（謝霆鋒）又係，休息嘅時間佢都係好集中去練嗰啲動作，好集中。」至於是否已成功轉型，她認為這不由得她來評價，自己要做的只有繼續前行，但的確她從北京回來之後，很多人，包括老闆楊受成都覺得她轉變了，問到箇中緣由，Jeana說：「我覺得係……心靈上得到一啲滿足，更加認清咗自己，同埋更加明白我自己條路應該點樣行，唔需要太過焦慮任何嘢，因為你控制唔到。」
迎接下一段戀愛前 先需要改善自己
世事，尤其緣份的確不由人去控制，不過幾年前Jeana都透露過自己恨拍拖，甚至改名希望催谷愛情運，旺婚姻，對於這刻的感情狀況，她笑笑回答：「我覺得……幾好吖！」Jeana續說，她發覺無論跟誰戀愛、結婚也好，過程中吃的、做的、講的，熱戀期的甜蜜抑或磨擦期的爭吵其實都是差不多，因此她領悟到：「大家都係同樣幾個point去鬧交，好似repeat再repeat，不過對象唔同咗。所以我覺得可能個天就係話，你第一次冇pass，畀第二次你！啊，你呢下都唔pass，再畀第三次你，你要過情關！一定要去到你Get到，原來咁樣發脾氣冇用，咁樣嬲係冇用，所以我覺得每一段經歷都係，你唔合格所以再畀一個去考你，我自己而家咁理解，幾得意，因為你總括係全部都係一樣嘅嘢。」
見Jeana講得起勁，原本以為有人正在陪她參透、學習這些戀愛道理和人生課題，殊不知她說：「冇呀，冇冇冇。」她只是從過去的經歷明白到，人有很多關要過，情關、健康關、忍辱關，當自己再三因為某些原因跟對方爭吵時，她便發現到，對象根本不重要，重要的是她要先理解事情的本質，學習不再為同一個理由動怒。講到尾，最需要改善的不是別人，而是自己，「要理解到件事根本就係咁，我使乜嬲？來來去去咪又係咁，你明白呢樣嘢，呢樣嘢合格咗，我覺得咩人都會夾得到。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
