香港港鐵四通八達，唔少藝人亦會選擇搭港鐵代步出門，而日前網上就流傳出一張張家輝搭港鐵瞓着嘅照片，並引嚟張家輝本人回應道：「已經瞓唔到覺，仲要搭車瞓覺都畀人偷拍。」瞬間掀起唔少粉絲熱議。
事實上，原來係張家輝為宣傳即將月底上映，個人第四部執導作品《贖夢》嘅宣傳，相中嘅張家輝亦着上戲中蔡辛強嘅的士司機打扮，而戲中嘅蔡辛強亦因過往經歷，令佢一直發噩夢冇覺好瞓，甚至一度喺載客期間瞓着發生意外。此外，張家輝亦特地以蔡辛強（Choi San Keung）身份開設社交網，唔止解開「地鐵偷拍」之迷，仲親自錄音回應：「已經瞓唔到覺，仲要搭車瞓覺都畀人偷拍。」之餘，該社交網亦有多條錄音：「冇人明，晚晚發噩夢，瞓唔到覺有幾辛苦。」、「又發噩夢喇，呢個噩夢仲要搞我幾耐呀！」、「我聽個客講，喺呢度講自己嘅秘密同心事，我都有好多嘢想同大家分享下。」、「有冇人識得一啲，唔會發噩夢嘅方法呀！」其中，更會搞氣氛爆粗道：「成日咁樣鑽法，鑽到我黐X咗線喇！」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
