邁治蘭疑似頭部受傷，一度失去知覺。(Getty Images)
去片睇邁治蘭受傷過程
周六(12日)凌晨意甲，AC米蘭作客以4比0大勝烏甸尼斯，但付出沉重代價，門將邁治蘭同隊友阿歷斯占美利斯相撞之後， 一度失去知覺，需要立即送院治療，幸好並冇生命危險，總算大步檻過。
AC米蘭上半場後段由翼鋒拉菲爾利亞奧、中堅史達軒查柏夫洛域各建一功，領先2球，換邊後7分鐘發生「火星撞地頭」，A米門將邁治蘭衝出禁區外解圍，同回防嘅隊友右後衞阿歷斯占美利斯，猛烈相撞，雙雙倒地。
邁治蘭疑似頭部受傷，一度失去知覺，軍醫立即入場為兩人治療，令現場職球員非常緊張，正在熱身賽嘅AC米蘭前鋒譚美阿巴謙跪地，為邁治蘭祈禱。
最終邁治蘭需要用擔架抬離場，事後AC米蘭發表聲明，指呢位法國國腳離場時已經恢復知覺，佢入院後將接受進一步檢查。比賽繼續之後，AC米蘭再由迪奧靴南迪斯、雷恩達斯各入1球，贈烏甸尼斯4蛋。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
