掃呢頁CODE去手機

2025年5月14日 星期三

沙特:小C朗國家隊首演大陣仗 曼聯等十多間球會派人觀戰 #曼聯

「小C朗」首次為葡萄牙U15上陣。葡萄牙巨星C朗嘅大仔「小C朗」周二(13日)晚首次出戰國際賽,為葡萄牙U15上陣對日本U15,令呢場青年軍比賽成為球 ...




「小C朗」首次為葡萄牙U15上陣。


葡萄牙巨星C朗嘅大仔「小C朗」周二(13日)晚首次出戰國際賽,為葡萄牙U15上陣對日本U15,令呢場青年軍比賽成為球壇焦點。根據英國《太陽報》報道,曼聯、熱刺、拜仁慕尼黑、祖雲達斯等十多間大球會,都派出球探入場觀察呢位最強「星二代」表現,各大豪門磨拳擦掌準備搶人。


「小C朗」日前首次晉身小國腳,獲得葡萄牙U15徵召,參加喺克羅地亞舉行嘅賽事,被認為係繼承爸爸衣缽嘅第一步。C朗亦不忘為乖仔打氣,喺社交網上載比賽相片,寫上:「首次亮相,兒子,我為你感到驕傲!」


雖然「小C朗」擁有巨星老竇光環支持,但今場只能先擔任後備,直至54分鐘獲派上陣。根據官方資料,將於6月17日15歲生日嘅「小C朗」大名叫基斯坦奴杜斯山度士(Cristiano dos Santos),佢身穿C朗招牌7號球衣。


由於當時葡萄牙U15已經領先3比0,司職前鋒嘅「小C朗」上陣後發揮空間有限,最終協助球隊大勝4比1。葡萄牙U15嚟緊仲會對希臘U15、英格蘭U15,「小C朗」仲有機會爭取首個國際賽入波。


「小C朗」一直跟隨住爸爸生活,所以曾經喺祖雲達斯、曼聯青年軍受訓,現時踢緊艾納斯青年軍,佢今次踢國際賽,立即吸引多間大球會關注,非常有興趣簽入呢位「星二代」,尤其是C朗同艾納斯續約出現阻滯,可能離開沙特阿拉伯,「小C朗」有機會重返歐洲,至於最終花落誰家,相信要問老竇C朗意見。

本文作轉載及備份之用 來源 source: http://hk.on.cc
鍾意就快D Share啦!