憑《甄嬛傳》爆紅全國、再憑《那年花開月正圓》躍升國民女神嘅孫儷，同鄧超結婚多年一直恩愛，一家四口出名溫馨。早年兩公婆已攞咗香港身份證，最近更有消息傳出，香港並非呢家人嘅終極目標，英國先至係！傳聞鄧生鄧太連同仔女即將移民英倫！
噢，係真唔係呀？今時今日國家崛起，好多一線港星都北望神州，搵人仔成為指定動作。孫儷貴為內地影視界一姐，兼且傳聞擁有「黨員」身份，忽然有移民消息傳出，似乎政治唔多正確喎。
嗱，真係傳到似層層㗎。孫儷日前喺社交網，分享喺倫敦Tower Bridge拍攝嘅靚相，仲好有心機咁晒埋13歲少女時期，身穿紅衣喺同一地點影嘅舊照。內地網民隨即指出，孫儷兩個寶貝仔女，目前喺倫敦頂尖私校就讀，一家人嘅生活重心亦已轉往英國，唔止喺當地購置豪宅，鄧超仲有意將事業國際化，對內娛不再留戀。
空穴來風，未必無因。近年孫儷影視產量明顯減少，最近期嘅作品，已經係同台灣影帝吳慷仁合作嘅劇集，仲傳出因為吳慷仁「愛國」表態激起台灣網民責難，孫儷擔心受拖累而罷拍，不過好快就證實只係流料，雙方強調合作愉快。從種種流言蜚語觀之，孫儷同其他「愛國演員」嘅取態，似乎有一定距離喎。
粉絲對孫儷移英傳聞感到驚訝，但大多表示支持，亦有粉絲質疑消息可信性，孫儷則未有回應。只能講句，人望高處，水往低流。畢竟好多中國人長期對西方充滿幻想，好多明星熱衷移民，好似鞏俐嫁完坡佬再嫁鬼佬，早已脫亞入歐。人各有志，冇得批評對錯。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
