講到人生最燦爛嘅時刻，許冠文有感而發，停下數秒整頓一下心情才發表，他說：「我覺得最燦爛就係而家，因為我睇通咗啲嘢，尤其是《破地獄》嚟講，人生追求嘅意義係乜嘢呢？我成日都講過好多次，你又唔知喺邊度嚟，嚟呢度做乜嘢？尤其是死咗之後又唔知去邊，三樣嘢都唔知，做人會點快樂，仲有日日返工做乜嘢，成日諗咁人生嘅意義係乜嘢呢？但當我睇咗呢套電影嘅劇本之後，發覺編劇好好犀利，佢哋只係得40幾歲，竟然可以編呢啲嘢出嚟，答咗我嘅問題，原來生命最重唔係個意義嚟，生命最緊要就係得一次，你還掂上咗車，你最後都會落車，因為有一樣嘢就係你肯定會死，咁個意義就係欣賞沿途嘅風景囉。當你做得一日人，就欣賞一日嘅沿途風景，最好享受到盡先勁，同埋欣賞埋旁邊嘅人，你試下回憶一生，你珍惜或真係同你一齊嘅有幾多？好命嘅十個八個，或者都未必夠，所以我覺得最緊要欣賞旁邊同你一齊嘅人，甚至遠大啲連你嘅敵人都欣賞埋，其實有咩敵人啫？除非好離譜，我覺得難得一齊囉，原諒佢就原諒佢，或者欣賞埋佢，因為生命好短暫，沿途風景亦好短暫，無論好人或者敵人都係嗰一轉車，咁呢個係我拍《破地獄》獲得好大嘅收穫。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
