43歲韓流女神全智賢宣布自立門戶，成立公司自己做老闆，揚言「要回顧自我和尋找新方向」，聽佢口氣，新公司似乎唔止管理自己嘅演藝工作，下一步可能會羅致其他演員，由女神升呢做女社長，犀利呀！
女神仲不惜剪掉三千煩惱絲，以一頭清爽短髮示眾，真係好有夏日色彩！之不過，口痕友就話，女神五官唔算完美，一直都係以白皙肌膚、瀑布長髮及高挑身段取勝，忽然自毀優點，吸引力頓失喎！嗱，各花入各眼啫。
話時話，中國人傳統認為頭髮係煩惱絲，所以和尚尼姑遁入空門要削髮，寓意同塵世所有煩惱切斷；而以前個年代，但凡女人剪掉長髮，都會被認定失戀後想重新開始！哈，呢啲思想都好老土，但女神想重新開始，似乎唔係冇原因。
事業上，女神都停滯咗一段時間，粉絲等到頸長，新劇《暴風圈》9月終於開播；與此同時，女神呢排都係以品牌大使身份周圍飛，飛中國飛歐洲，搞到被毒舌網民話佢個樣殘爆！韓媒就透露，女神之所以頻頻接Job，完全唔似豪門少奶奶唔憂做，係因為老公唔生性，投資爆煲要女神填氹！
呢個老婆認真唔話得！話說佢老公崔俊赫投資遊戲公司開發嘅區塊鏈遊戲失利，勁蝕150億韓圜，即係成8千幾萬港紙，嘩，好甘喎！該遊戲可以讓玩家將資產轉換為虛擬幣，點知系統今年2月被黑客入侵，盜走90億韓圜，而且拖延公布，因而被法院判定「公告不誠實」、「交易需謹慎」，股價連同幣值跌到仙都唔仙吓。女神為咗頭家，唔捱到殘至奇，梗係希望重新開始
本文作轉載及備份之用 來源 source: http://hk.on.cc
|
鍾意就快D Share啦！
|
|
|
