美斯同沙特有唔少連繫。(Getty Images)
法國權威媒體《隊報》爆料，阿根廷球王美斯同國際邁亞密合約年底完結，沙特豪門吉達艾阿里已展開斟介行動，希望將呢位38歲前鋒引入沙特。身為沙特旅遊大使嘅美斯，2年前去美職前已幾乎登陸沙特，今次舊情復熾，「球王」早前亦公開表態樂意嘗試新挑戰。
美斯同國際邁亞密嘅合約今年底完結，雖然班主碧咸想佢再續多1年，但《隊報》消息指沙特仍未放棄2年前引入美斯嘅計劃，作為4支由沙特公共投資基金(PIF)擁有球隊之一嘅吉達艾阿里，已同美斯陣營接洽。早喺2023年美斯離開巴黎聖日耳門嗰陣，希拉爾曾開出400萬美元年薪力斟，但美斯選擇去美職，希拉爾最後改簽美斯老友尼馬。
報道未公開吉達艾阿里今次斟介嘅財務細節，但形容球會為實現交易會「傾盡全力」，而且美斯曾簽約沙特旅遊局出任大使，令吉達艾阿里更有信心可以遊說球王加盟。吉達艾阿里目前擁有艾雲東尼、羅拔圖法明奴、馬列斯等球星，最重要係美斯若果加盟，有機會同艾納斯嘅C朗拿度正面交鋒。
美斯喺3月份接受美國《時代雜誌》專訪，曾公開表態樂意去沙特：「我成日都諗去沙特踢波嘅可能性，我好熟悉呢個國家，佢哋將來可以建立一個好有力量嘅聯賽。我作為沙特旅遊大使，呢個地方確實好吸引，每次去到我都好享受。2年前我要選擇沙特或美職，兩個選項都好吸引我。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
