曼聯終於唔使做水魚(Getty Images)
曼聯重金簽入馬菲奧斯根夏之後，最近斟麥比奧莫又再畀人抬價，呢類行為外間統稱為「曼聯稅」，不過曼聯嚟緊一單交易終於可以擺脫「水魚」污名，就係免費簽入愛華頓棄將卡維特利雲。
28歲嘅卡維特利雲上星期宣布約滿離開愛華頓，新球季將以自由身搵班落，英國傳媒報道，曼聯、紐卡素及列斯聯同時對呢位前英格蘭國腳感興趣，曼聯處於領先位置，卡維特利雲離開效力9年嘅愛華頓時表示，希望尋求新挑戰，加盟跌落谷底嘅曼聯就夠晒挑戰性。
卡維特利雲高峰時期身價高達9,000萬鎊，不過近年飽受傷病困擾，狀態嚴重下滑，如果回復健康，加上英籍球員身份，的確不愁出路。
曼聯正全力重建陣容，前鋒線打算大換血，馬菲奧斯根夏同麥比奧莫將出任三箭頭嘅左右前鋒，正中鋒位置將會踢走海倫，搵新中鋒代替，主帥魯賓艾摩廉心目中人選係士砵亭神鋒約基利斯，但該瑞典箭頭將加盟阿仙奴，其他人選又嫌棄曼聯冇得踢歐洲賽，所以搵卡維特利雲就最適合，最重要係佢免費，曼聯增兵預算可慳一大筆，符合班主拉特克利夫嘅理財政策。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
