奧拿拿練波都受傷。(Getty Images)
力圖喺新球季振作嘅曼聯，「黑氣」似乎仍然未除，開操幾日就出現嚴重傷患，門將奧拿拿喺訓練期間拉傷大腿肌肉，面臨養傷長達2個月時間，唔單止會缺席所有季前熱身，就連英超開咧亦未必趕得切。曼聯本來亦有換龍門嘅打算，但今次傷患就令計劃更加困難。
曼聯喺周四(10日)先齊人開操，19日喺瑞典對列斯聯踢首場熱身賽，之後就會進行美國之旅，估唔到啱啱開操就有麻煩。據報奧拿拿對初步測試反應良好，但預期養傷期為6至8個星期，佢仍會隨隊出發去美國，但只能夠進行康復練習，8月中英超開咧戰對阿仙奴亦未必踢到。
奧拿拿養傷期間，土耳其門將比恩迪亞將會負責把關，上月續約嘅39歲門將湯希頓就出任副手。早前有傳曼聯考慮夏天更換門將，阿士東維拉嘅達米安馬天尼斯、安特衞普嘅辛尼拉文斯等都係目標，但奧拿拿依家受傷，要賣走佢嘅難度更高，曼聯亦冇「閒錢」買多個龍門，進退兩難。
曼聯喺1個半月前火速簽入巴西前鋒馬菲奧斯根夏，但轉會計劃之後陷入停滯，收購賓福特前鋒麥比奧莫一事，討價還價多時仍未達共識，就連「棄將」拉舒福特、阿歷真度加拿祖、安東尼馬菲奧斯同查頓辛祖都遲遲未賣得出，令球迷心急如焚。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
