柏德列多古(右)入1球及1次助攻。(Getty Images)
曼聯喺周四(31日)早上「美國之旅」季前熱身賽火力全開，海倫打破近3個月入球荒，加上柏德列多古、阿密特迪亞路、小將伊頓威廉斯各入1球，以4比1大勝般尼茅夫，獲得2連勝，亦係紅魔鬼近5次對般尼茅夫，首次贏波。
曼聯延續上場贏韋斯咸嘅強勢，採取主動搶攻，開賽8分鐘，柏德列多古左路傳中，射手海倫無人看管之下頂入，亦係呢位22歲丹麥國腳自從5月初歐霸盃4強次回合對畢爾包後，相隔近3個月首次入波。
紅魔鬼繼續控制大戰，踢到25分鐘，美臣蒙特「醒目」快開罰球，般尼茅夫球員冷不提防，柏德列多古單刀射入成2比0。其後般尼茅夫中場安東尼施美安曾經射門入網，但因為越位被判無效。
換邊後，曼聯攻勢浪接浪，美臣蒙特遠射僅貼柱出界，跟住阿密特迪亞路主射罰球，省中人牆高出，轉個頭呢位科特迪瓦國腳把握門前混戰，射成3比0。
戰至72分鐘，後備上陣嘅19歲小將伊頓威廉斯亦入1球，臨完場前，曼聯中堅馬菲斯迪歷特出腳解圍，反而擺烏龍，令到般尼茅夫可以破蛋。
值得一提，曼聯新簽「10號仔」馬菲奧斯根夏經過連續2場擔任正選後，今仗冇份參賽，領隊魯賓艾摩廉表示，呢位巴西國腳出現疲勞問題，但並冇大礙，可以出戰下場熱身賽對愛華頓。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
