歌手Tyson Yoshi（Ty）與太太Christy正於意大利舉行婚禮，好友張敬軒被安排與Ty家人同行及入住酒店。Tyson Yoshi正式拉埋天窗，搞3日嘅婚禮現去到第2日嘅正式婚禮儀式，見Ty西裝骨骨現身，未有如第一日歡迎派對中露出心口，終於都正經打扮示人，並步出樓梯等待接新娘；Christy則以Low Cut米白色長裙當婚紗，拖實爸爸隻手緩緩走近嘉賓行禮。
圈中好友魏浚笙、Serrini、Locker與女友Marf及婁峻碩夫婦等均在場見證。一對新人多次於水池前咀嘴，浪漫有氣氛，又手拖手走上樓梯離場，Ty更係多次表現得戚樣，逗得全場大笑，賀佢抱得美人歸。二人為婚禮花盡心思，現場有巨型吊燈、婚禮蛋糕以水果拿破崙Cake迎合賓客口味等，二人更同心切Cake後咀嘴，背後更有煙光襯托，場面感人又有Feel。一對新人在婚宴上更被嘉賓高呼三年抱兩，Tyson Yoshi即答︰「盡力！」親口承諾會積極造人。
去到晚飯時間，眾親友均去到露天餐桌用膳，新郎Ty High爆拎起成支白酒（其實係水）狂隊，Christy則全程傍到實。親友們喺現場音樂下熱健，之後一對新人亦被起哄跳舞，見不善舞藝嘅Ty都有畀面扭兩下，即令現場親友瘋狂歡呼。入夜後，眾人轉戰室內唱歌，現場有Live band坐陣，加上柔和Blue mood燈光，張敬軒當然上台為新人獻上最真摰祝福，並以海豚音自彈自唱經典情歌《Lovin' You》，即冧得新娘子Christy化身人形咪架幫佢拎咪。
其實今次婚禮張敬軒多次被笑言似足主人家，佢由婚禮前席嘅文書工作，到晚宴前細執桌椅擺位，當Christy跳舞時為佢整理裙擺，加埋最後嘅深情獻唱，更被發現佢叫Ty妹妹做「阿妹」等，明顯已經融入Ty家中，難怪Ty於致辭時，就特別多謝張敬軒嘅幫忙：「我要你（張敬軒）同我屋企人一齊住，其實真係唔係為咗要啲咩…我係真係好唔好意思，但你呢兩日真係幫咗我好多，幫咗我非常非常之多。Thank you so much！Thank you！Thank you！」Tyson Yoshi亦有PO出偷拍張敬軒為他整理疑似菜單影片，更講道：「黐線佬忙咗成朝，幫我搞呢樣搞嗰樣，唉，都唔知點樣多謝佢！」張敬軒搞笑回覆：「偷拍你個死仔。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
