男團MIRROR成員王智德（Alton）與馬來西亞女神林宣妤及藝人陳子豐的新劇回到校園時，3人自揭兒時頑皮事作大比併，Alton自爆曾硬闖鎖上的課室，外表斯文的宣妤試過弄哭老師，子豐則因逃學而捱打，可謂不分高下！
Alton、林宣妤與陳子豐主演的ViuTV原創劇《社畜再培訓先導計劃》最近熱播，Alton與子豐飾演公司小職員，被安排再培訓重讀小四，宣妤則是劇中老師，他們跟6位小朋友有大量對手戲。雖然跟小朋友合作被視為拍戲最大難題，但3人大讚小演員們非常專業，Alton更揚言：「我同一位小演員有條主線，可以話係佢扶住我去做，係佢引我入戲，佢哋準備功夫好足，仲有家長做後盾，好犀利！」子豐大爆Alton甚受小演員歡迎，更跟他學唱歌，Alton坦言：「我有自帶光環，佢哋好容易對我好熱情。（佢哋都係你粉絲？）唔好咁講，只係有聽我嘅歌啫！」
至於拍攝《社》劇可有令他們憶起求學時往事？Alton自言不算壞學生，只是佻皮，曾試過偷入鎖上的班房：「有一次我同同學留喺學校溫書，當時有幾間班房翻新咗有冷氣，但未正式用得，我哋發現個鎖係好容易爆開，我哋偷偷入咗去。」宣妤自爆小學時因上堂玩橡筋，弄喊了新來的老師，被罰見校長；而子豐自認是曳學生：「最曳係小學時逃學，小息同幾個同學爬咗出校外冇返課室，最後當然被捉到，被罰企同打手板。」
提到劇集名叫「社畜」，問到3人可有對「社畜」特別深刻的經歷或體會？Alton笑言：「相信在座咁多位都係社畜，尤其每朝鬧鐘響嗰吓，好唔想起身。」不過，宣妤與子豐卻大唱反調，揚言不覺自己是社畜，更調侃Alton謂：「我唔夠你咁忙，我都想咁忙。」嚇到Alton急急大叫：「微臣告退！」3人又大談入行前的工作經驗，Alton可算打工達人：「我做過好多份工，想體驗多啲唔同嘢，對過傳單、跟車、做飲食、搬傢俬同做教練，最辛苦係做飲食，因為時間長，人工又唔高，仲要企足好多個鐘。」
同樣做過飲食業的宣妤非常認為Alton的說法：「我做過廚房一個月，又熱又要企成日，開完工第一日我打畀爸爸，我話我終於明白你工作嘅辛苦，後來我因為切傷手就辭工。」而讀演藝出身的子豐在自言曾試過做保險從業員，但最後發現自己並不適合：「我做咗一年，好唔習慣每朝早返公司開會，要講啲好激勵性嘅說話同追單，覺得透唔到氣，說人買保險覺得尷尬。」
服裝：@marith_hk（陳子豐）、Ralph Lauren（林宣妤）
化妝：Yumi Cheung@Annie G. Chan Makeup Centre（王智德）
髮型：Frankie Ho@HairCulture（王智德）
本文作轉載及備份之用 來源 source: http://hk.on.cc
|
鍾意就快D Share啦！
|
|
|
