




圍繞《破.地獄》主題講座上,梁雍婷分享自己在劇本上標注的筆記,在座談後與朱栢康一同受訪時,直言筆記非常私密:「我係因為陳茂賢導演先攞出嚟咋!我都諗咗好耐,因為呢件事好赤裸,但為咗佢、我可以嘅!」朱康隨即笑言:「我就推咗嘅!因為我覺得實在太赤裸喇!加上你睇我寫嘅嘢、同我喺講座上講嘅嘢,會係兩回事嚟,因為我只係寫畀自己睇,大家見到『蘋果、牙籤、飛機』咁樣會唔知咩嚟!」梁雍婷更表示如果交換筆記,赤裸程度會更誇張:「太私人喇!原理同交換底褲着一樣!」

講座上播放從未被公開的《破.地獄》刪剪片段,與郭志斌、郭文玥兄妹相處有關,朱栢康表示對該段落有印象:「我哋睇初剪嘅時候,嗰段係有喺到嘅,但係剪埋一齊嘅時候、就明點解剪走咗。」他更透露有另一段與黃子華對戲的珍貴片段被剪走:「(劇情中)我移民嘅時候、子華哥送我哋一家去機場,我帶住一種內疚、但又冇辦法嘅心情,將一切責任交低畀子華,同佢講『我冇用呀!屋企你幫我睇住先』有一場咁嘅戲剪走咗。」但朱康表示戲份被剪走仍不覺可惜,因為早於演出時享受與黃子華演戲的快樂。

日前,香港演員柯煒林對外公開患上肺腺癌消息,曾於電影上合作的梁雍婷表示有向對方表達支持:「我畀到嘅支持就係足夠空間,同埋一句『只要你需要,我會喺到!』」朱栢康亦表示:「我就隨時準備好啦,正如Rachel所講,佢需要休息時就好好休息;佢需要人陪嘅時候就去陪伴,唔好覺得驚煩到!柯煒林生命力好強嘅!其實我較早前已經知道,但明白有好多事情需要處理,所以直到公開先去傳訊息關心。」至於柯煒林需要休養辭演舞台劇,朱康則表示:「當然覺得可惜,但養返好身體,唔好話50場,100場、300場都可以演得到!我哋作為演員,身體就係我哋嘅工具,點都係身體健康行先!」


本文作轉載及備份之用 來源 source: http://www.hk01.com
鍾意就快D Share啦!
|
|