「宇宙巨肺」鄧紫棋（G.E.M.）駕臨啟德主場館開騷，世界級唱功及製作贏盡口碑，唔止場場爆滿，觀眾仲盛讚係啟德啟用以來，最佳視聽之娛！冇誇張㗎，之前幾多一線巨星喺呢度開騷，結果都敗於不濟嘅音響效果，山頂嘅觀眾紛紛話聽唔到唱乜，就連追星局長都曾經表示，啟德音響有改善空間。
G.E.M.以強橫唱功征服啟德，真係令一班粉絲好感動。隨便喺Threads碌一碌，就見到大量貼文，表示坐山頂倒數第二行，依然清晰聽到宇宙巨肺把聲，仲有網民話，G.E.M.憑一己之力，終於為啟德平反！
又係噃，之前無論係周杰倫、謝霆鋒定係JJ，喺啟德開騷，山頂嘅觀眾一律話聽唔到佢哋唱乜，講嘢淨係聽到回音，完全聽唔到內容，唔少人認定紅館比啟德正好多！喂，一個簇新嘅場地，冇理由音響咁流啫。
尤其周杰倫，因為有太多遞咪畀觀眾大合唱嘅環節，加上又有大陸觀眾點唱，真正唱歌嘅時間有限，因而被部分觀眾大鬧物非所值，質疑亞洲天王回晒塘！當時就有粉絲為杰倫緩頰，話佢都係想觀眾參與多啲啫，何況啟德音響唔好都出晒名啦。
哼哼，意想不到家陣畀個後生女技術性擊倒！原來最重要係唱功同埋製作！咁就抵宇宙G.E.M.豬籠入水啦，淨係呢次《I AM GLORIA》世界巡演，總票房已突破4億美元，成為有史以來女歌手票房第四高，超越國際巨星麥當娜及韓國女子天團BLACK PINK。所以啫，呢啲係G.E.M.努力同天賦換嚟嘅成果，酸葡萄唔恨得咁多！
本文作轉載及備份之用 來源 source: http://hk.on.cc
|
鍾意就快D Share啦！
|
|
|
