由鄭保瑞執導嘅賣座港片《九龍城寨之圍城》，今年初喺日本捲起「龍捲風」，於當地上映後大收旺場，日本開畫首20日已破1億日圓票房！2月時，古天樂就偕同鄭保瑞、林峯、胡子彤、張文傑展開日本宣傳之旅，現身東京出席謝票場見當地影迷，並接受多間傳媒訪問，仲影晒雜誌封底照。《城寨》成功打開東灜市場，片中飾演大奸角「王九」嘅伍允龍吸納不少日本粉絲，近日更獲「頂流」級慶生應援，真係威盡。
前日（16日）係伍允龍48歲生日，有日迷喺新宿歌舞伎町東口大電視祝賀伍允龍，透過YUNIKA VISION買下廣告時間播出影片替偶像越洋慶生，並有網民分享片段：「城寨日本粉絲團夾錢花費500多萬日圓（26萬港元）喺新宿歌舞伎町東口大電視祝賀伍允龍大哥生日嘅巨型生日廣告成果（仲未計製作費！）日本粉絲團希望各位香港人可以睇吓佢哋嘅成果同努力。98%以上夾錢嘅人都係『真日本人』，只得兩三個在日港人同台灣人夾錢！以後各位香港人唔好再懷疑點解突然間多咗咁多人鍾意香港，學廣東話，鍾意香港電影！絕非詐騙！因為真喺好多日本人已經愛上咗香港文化同埋香港演員，真喺要多謝九龍城寨一眾演員同製作人。」該網民未有透露日本粉絲團所登嘅廣告會播幾多次，但翻查YUNIKA VISION官網報價，一日15秒影片由兩次到八次，收費低於42萬日圓（2.2萬港元），若花費420萬日圓（22萬港元），已可在大電視上連續30日每日播出8次。
而伍允龍憑「王九」一角人氣急升後，熱愛動漫文化嘅佢如願開拓日本市場，日本殿堂級遊戲製作人小島秀夫及美術總監新川洋司日前進行世界巡迴宣傳來到香港站，亦邀請伍允龍參與活動。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
