無綫戀綜《女神配對計劃 最後告白》昨晚（14日）畫上句號，除了葉蒨文與曾展望這對受到關注外，羅毓儀（Yuki）與林俊其（Kris）這對亦眾望所歸配對成功，相比曾展望的「霸氣之吻」，Kris就含蓄得多，節目上只是錫女方臉珠，而在慶功宴上，兩人被要求錫錫謝票，由於二人都是I人，初時表現得不知所措，Kris最終錫完Yuki面頰再錫額頭，但現場所有人都唔收貨，大叫「咀佢咀佢」，Yuki搞笑表示自己的嘴長在額頭上企圖「避過一劫」，但敵不過現場洶湧群情，最終Kris捉實Yuki來個肉緊嘴對嘴，錫完Yuki即時狂拍對方。
另外，關嘉敏（Carman）同李芷晴雖然有Matthew及Jacob表明心意，但係最後兩人都選擇單身而未有轉身，皆因二人均覺得時機未到。當中Carman強忍淚水的說出：「一個對的人錯嘅時間，同埋一個錯的人對嘅時間。」更引發網民無限心酸，Carman提到不選擇Matthew的原因：「我好多謝你，雖然你性格同我相差好遠，但我好多謝你，你會不斷去陪我笑、去陪我做所有嘢，我唔開心時你喺我隔籬，你好大方、好包容我，我知道你真係筍盤，但我覺得唔可以對你咁唔公平，因為我知道我個心喺第二個度。」
雖然在節目上並未配對成功，但Carman事後接受娛樂新聞台訪問時，未對Matthew完全落閘：「當然呢個節目唔應該係結尾，如果佢有心，佢都會完咗呢個節目約我，或者我哋再認識吓、再了解吓，再深入啲囉傾得。」問到是否代表向Mathew開綠燈，Carman笑言：「依家黃燈，等候中。」至於對另一求愛勇者細John，Carman則已決心將對方列入朋友範圍：「因為對於我同佢嚟講係最好嘅結局，但呢個節目冇諗過咁赤裸，誤會咗自己係參加男神配對計劃，唔知點解變咗我追男仔，我覺得幸福要自己爭取，今次算係新嘅嘗試，我人生都未試過追男仔。」
李芷晴接受東網訪問時表示未有因此而覺失望，她解釋說：「因為我喺過程中有好多得着，學習到好多嘢，亦對自己了解多咗，同埋反思咗好多自己嘅問題。」她自認以前是一個很容易投入戀愛的人，但透過節目發現，可能受以前失敗的感情經歷影響，加上已達所謂的適婚年齡，所以要開始一段新感情，對她來說變得愈來愈沉重及困難，在選擇時她也變得謹慎。
她坦言今次最後要狠心拒絕求愛勇者Jacob不容易：「以前嘅我係一個好唔鍾意做決定嘅人，因為我覺得做決定就要付上責任，所以好慣性會將啲決定權交俾其他人，偏偏呢個節目係要做好多抉擇，其實要做一個拒絕人嘅決定都唔係一件咁容易嘅事，拍攝當日我都好掙扎，亦都捉住唔嘅人去傾，監製Manho、Bob爸爸、我嘅閨蜜團、同埋跟住我哋嘅Writer，多謝佢哋嘅意見同埋支持，呢個節目令到我勇於去做決定，我都覺得自己有一個成長。」她稱經過今次拍攝，意識到自己的問題所在，認為先解決自己的問題再開展一段新嘅關係會比較好，並學懂要欣賞及愛惜自己。
另外，講到網上的評論，她指現時已釋懷不少：「坦白講節目初期我係有因為大家嘅評論而好唔開心，亦都會因此而質疑自己，但係我覺得我開始慢慢放鬆咗自己嘅心態，亦都唔會再期望所有人都理解自己，如果你哋理解我嘅話我會好開心，唔理解嘅話我亦都會好尊重。」她稱可能有些網民覺得她想找一個條件更好的人，她強調：「喺我心目中愛情唔係一份清單，唔係邊個條件符合更多就選擇邊個，而係遇見一個特定嘅靈魂，然後發現成個世界因此而變得唔同。當我準備好嘅時候，我依然期待愛情嘅到來。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
