曼聯開季成績創33年新低。(Getty Images)
曼聯夏天豪使逾2億鎊增兵，不過成績持續下滑，佢哋周一(15日)凌晨英超「曼市打吡」，作客慘吞曼城3蛋後，4戰只得4分排喺第14位，創下曼聯33年來最差開季成績。領隊魯賓艾摩廉嘅3-4-3陣式再受詬病，但佢賽後堅決表示唔會改變，揚言要轉陣就炒佢魷魚！
曼聯今場首度用班捷文施斯高擔正箭頭，曼城亦有基安盧基當拿隆馬首演把關。18分鐘曼城先拔頭籌，謝利美杜古爆入禁區傳中，菲爾科頓頭槌頂入。下半場到艾寧夏蘭特表演，53分鐘佢爆過勞基梳爾射成2比0，2分鐘後趁曼聯犯錯幾乎再入，但扭過門將射空門卻中柱彈出。
曼聯尾後急於反撲令防線空虛，68分鐘艾寧夏蘭射接應貝拿度施華妙傳，單刀推咗半場輕鬆射入，曼城最終大炒曼聯3比0。曼聯開季4戰只得4分，係自92/93球季後頭4輪聯賽最低得分，上季佢哋雖然排史上最低15位，但頭4輪都拎到6分，真係低處未算低。
艾摩廉上季喺開季後臨時接手，可以解釋冇時間適應新戰術，但曼聯夏天重金簽入多位球星，結果開季成績再創新低，名宿堅尼賽後批評：「領隊有佢嘅堅持，但成績唔掂，我擔心球員已經失去信心，佢已經使咗2億幾鎊，又有充足季前備戰，仲要搵新嘅藉口？」
雖然唔少人相信3-4-3唔適合曼聯球員，但艾摩廉賽後企硬回應：「我係唔會改變(陣式)！如果有一日我想改變自己嘅足球哲學，我會做，但如果我唔想，你要轉嘅話就轉走我。我要同球迷講嘅係，我一日留喺曼聯，都會盡全力幫助球隊，其他嘢唔係由我決定。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
