馬菲奧斯根夏(右)上輪英超受傷退下火線。(Getty Images)
曼聯將於周日(14日)晚英超「曼市打吡」作客曼城，大戰前夕，紅魔鬼傳來不利消息，領隊魯賓艾摩廉透露，3位主將馬菲奧斯根夏、美臣蒙特、達洛治因傷缺陣，意味鋒線「三叉戟」缺少兩人，或要焗用仍未融入球隊嘅新加盟射手班捷文施斯高擔任正選，令原本疲弱攻力雪上加霜。
魯賓艾摩廉今季慣用馬菲奧斯根夏、美臣蒙特、麥比奧莫組成鋒線，但根夏、蒙特上輪英超對般尼，不幸受傷退下火線，即使近日可以進行簡單操練，但艾摩廉表示，兩人仍然唔適合參加比賽：「佢哋冇份對曼城，亦唔知道幾時可以復出。」
英國傳媒指曼聯今場「曼市打吡」焗住變陣，將中場般奴費南迪斯推前頂替美臣蒙特，班捷文施斯高代替馬菲奧斯根夏嘅位置，呢位22歲斯洛文尼亞國腳成「魔」以來，為曼聯上陣4次，僅曾於英聯盃擔任正選，而且4場都冇波入，亦冇助攻。施斯高身價達6,600萬鎊(約7億港元)，被網民嘲諷係「貴價水貨」，由佢擔正鬥曼城，恐怕難有作為。
至於後衞達洛治早前雖然有份入選葡萄牙國家隊，但因為肌肉問題，提前退隊返回曼聯療傷，佢亦唔可以出戰曼城，估計將由柏德列多古頂替其正選位置。
另邊廂，曼城同樣受傷兵問題困難，領隊哥迪奧拿表示，卓基、馬莫殊、艾洛利將缺陣對曼聯，手上只有16位健康球員可用。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
