張翼東畢業於香港演藝學院表演系，求學期間經同班同學認識電影業內幕後工作人員，八年前得知《風林火山》需要尋找金城武文戲替身演員，張翼東便經同學介紹參與：「佢哋要搵金城武嘅文戲替身拍大Wide Shot、背面與手手腳腳。我同學就介紹咗我去，因為我身高同身形都同佢差唔多。」張翼東表示有意參與後，無須經過試鏡便獲取錄。
張翼東參與《風林火山》金城武的文替工作後，竟獲得意外驚喜，劇組得知張翼東亦為演員後，便請他參演金城武於廚房發狠一幕的角色，成為情節中李霧童手下吸毒的西裝男。該段劇情中，張翼東上演被金城武從雪房拖出、將頭部塞在洗手盤中淋冰水、最後連續掌摑的橋段：「做咗佢替身，之後先知道要拍呢一場戲。過程係真摑，因為拍長鏡頭，每次都要一氣呵成打我。大槪係每次6巴，拍攝六個鏡頭總共36巴！」他更盛讚金城武每次出手準繩度極高、每巴均摑在面上、沒有傷及眼耳口鼻。
由金城武替身、繼而有幸同框演出，張翼東表示金城武為人非常友善專業，亦對大小演員非常禮貌：「拍完最後個鏡頭，我出咗去抹頭。佢主動行過嚟問我『你沒事吧？』好緊張擔心我有事。我答『我冇事，和你拍這場戲是我的榮幸』佢好擔心咁話『榮你的頭呀』然後畀咗一個安慰嘅擁抱我。」
麥浚龍導演作為《風林火山》的靈魂人物，張翼東在拍攝中亦親身與對方接觸。對於麥浚龍督導拍攝的方法，張翼東透露在演繹上自由度甚大：「佢冇教我點演，只係講成場戲嘅背景，角色嘅狀態。佢會講動作行位，但係點樣演，佢就交畀我哋發揮。」更表示麥浚龍亦是相當體察演員需要的導演：「有一場我係做替身，要做啲動作，都辛苦，做完隻手震晒。完咗之後導演就開咪講『全廠收工。我哋多謝阿東』跟住全場拍手掌，我都好感動、好難忘！之後仲邀請我入去導演帳篷，同佢一齊睇Playback（畫面回放）。」雖然張翼東未能透露替身戲份屬於甚麼橋段，但笑言觀眾觀賞期間或能夠細心留意、察覺得到自己演出的部份。
本文作轉載及備份之用 來源 source: http://www.hk01.com
|
鍾意就快D Share啦！
|
|
|
