般奴費南迪斯獲曼聯頒發一件印有300的球衣。
曼聯將於周日(26日)凌晨英超主場對白禮頓，今仗將會係隊長般奴費南迪斯第300次為紅魔鬼上陣，別具意義。賽前英國《太陽報》爆料，指呢位31歲葡萄牙國腳合約包含一項解約條款，其他聯賽球隊明夏可以用5,700萬鎊(約5.9億港元)直接買斷佢，再次令外界猜測般費踢完今季之後，會去沙特阿拉伯「掘金」，佢開腔回應，指主帥魯賓艾摩廉作出挽留，所以冇打算「脫魔」，並以率領曼聯奪取英超及歐聯冠軍為終極目標。
般奴費南迪斯2020年1月底由士砵亭加盟曼聯，至今為紅魔鬼各項賽事上陣299場入100球及87次助攻，出戰白禮頓前夕，會方特別向呢位中場頒發一件印有300嘅波衫，提早祝賀佢迎來紅魔生涯第300戰。般費將於2027年6月約滿，有權自動續約多1年，但早於年初已傳出沙特阿拉伯豪門希拉爾計劃收購佢，今夏幾乎離隊。
關於般費可能去沙特搵食嘅傳聞此起彼落，佢現時親自公開當中來龍去脈：「希拉爾等幾支沙特球隊，甚至有歐洲球隊都曾經邀請我加盟，開出非常吸引薪酬條件，但我拒絕。冇錯，我的確講過如果曼聯想出售我套現，我願意接受安排，畢竟希拉爾開出8,000萬鎊至1億鎊轉會費，但同領隊艾摩廉傾過後，佢話我仍然屬於計劃一部分，可為球隊作出重要貢獻，佢想我留低，會方亦無意出售我，同外界傳聞完全唔一樣。」
此外，般奴費南迪斯透露太太都希望佢繼續效力曼聯：「老婆問我為曼聯達成夢想未？答案當然係未，因為我嘅目標係協助曼聯奪取英超及歐聯冠軍。」般費今次發表「效忠宣言」，應該可以粉碎離隊傳聞。
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
