文仙尼(右)有信心率領曼聯復興。(Getty Images)
曼聯領隊魯賓艾摩廉一直帥位不穩，不時傳出面臨被炒，根據英國《太陽報》最新爆料，意大利名帥文仙尼私底下向朋友透露，自己願意執教曼聯，並有信心可以率領紅魔鬼復興，一旦曼聯換帥，呢位前曼城領隊或會自薦成「魔」。
曼聯上月底不敵賓福特後，魯賓艾摩廉幾乎被炒，幸好上場擊敗新特蘭，勉強保住帥位，但紅魔鬼未來4場非常難踢，包括周日(19日)晚「雙紅會」作客利物浦，跟住鬥白禮頓、諾定咸森林、熱刺，若然成績再冇改善，呢位40歲葡萄牙少帥可能喺11月國際賽期間下台。
英國《太陽報》引述消息人士指文仙尼有興趣重返英超，並同朋友講，自己係取代艾摩廉，執教曼聯最佳人選。據悉文仙尼以往曾於法國多個場合，同曼聯班主拉特克利夫見過面，彼此互相認識，呢位英國富商必要時可能搵佢接手領軍。
現年60歲嘅文仙尼球員時代及教波生涯同樣戰績輝煌，包括執教國際米蘭期間3次捧意甲冠軍，亦率領意大利國家隊奪得2021年歐國盃冠軍。最關鍵係文仙尼曾於2009至13年執教曼城，並於2011/12年球季協助「藍月亮」首次成為英超王者，該季「曼市雙雄」鬥到最後一輪，曼城補時戲劇性擊敗昆士柏流浪，憑較多淨得球力壓同分嘅曼聯，相隔44年再嘗頂級聯賽冠軍滋味，成為球壇經典。
文仙尼上年10月被沙特阿拉伯足總解僱後，未有新教職，可以隨時接過曼聯帥印。
足球博彩神器，每日重心提供盡在《彩報》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
