體育盛事「第15屆全運會」前晚於廣州舉行開幕禮，邀來多位香港、內地紅星演出，當中歌手容祖兒以「英皇一姐」身份率領3位小師弟包括曾比特等人登場，盡顯天后風範，事後她大讚眾人「聲音有力量」，合作充滿新鮮感。
本屆全運會由廣東、香港及澳門3地聯合主辦，開幕禮自然融匯香港元素在內，本港藝人汪明荃、容祖兒、曾比特、陳小春及林曉峰等紛紛站台演出，並由導演劉偉強擔任總監製。78歲的「阿姐」汪明荃於表演第二章節《同心同緣》內，與廣東、澳門歌手曾小敏及麥曉柔一同演繹經典粵曲，被指唱功突出，果然薑愈老愈辣。
緊接第三章《同夢同圓》則由「英皇一姐」容祖兒帶領師弟曾比特、樂隊Daze In White成員鄭宗健及李肇航出場合唱歌曲《龍騰伶仃洋》，再次炒熱氣氛。以Tube Dress打扮現身的祖兒帶住剛加盟英皇的曾比特企C位演出，她興奮表示：「希望大家喺今次賽事中搵到屬於自己嘅夢想。（負責帶住一眾師弟亮相喎。）唔好咁講，大家差唔多年紀，我早出道啫，哈哈！今次同曾比特和Daze In White合作好新鮮，佢哋把聲好有力量。」而她昨晚出席聖誕亮燈活動時又再補充：「我以前參加過08年奧運同亞運嘅演出，唔係年紀最大或最細，但今次做大師姐，責任感相對重咗少少。（以前有冇諗過做運動員？）做呢行同做運動員其實有啲相似，開騷都要不停練習，要好似運動員咁不屈不撓及堅毅。」
獲英皇開P慶生
至於曾比特明顯得寵，除有機會孖住師姐祖兒演出，獲祝福日後大紅大紫外，原來本月7日迎來32歲生日的他，還獲公司上下舉辦生日會慶生，難怪笑到四萬咁口，與昔日遭環球冷落相比，可謂天差地別！談到是次演出，曾比特直言十分驚訝：「自己有少少緊張，因為好似代表一個香港年輕人去演繹呢個青春熱情，所以事前都做咗好多功課，一路練習又Send畀導演聽，等佢畀啲意見我，希望大家滿意啦。」他坦言是首次面對那麼多觀眾：「最開心係演繹首咁激情嘅歌，又有咁多人同我一齊唱，自然會有種好激動嘅感覺，所以我好Enjoy今次舞台。」
曾參演劉偉強執導電影《古惑仔》系列的陳小春、謝天華、林曉峰及錢嘉樂於台上合唱《海闊天空》，可惜「靈魂主帥陳浩南」鄭伊健未有露面。至於內地歌手周深及單依純則以壓軸嘉賓身份登場，合唱全運會主題曲《天海一心》，兩人歌聲襯到絕，被形容為「王炸組合」。單依純早前受訪時曾表示：「我在錄音時聽到周深老師唱，真的像天籟之音，給我們太多溫暖和力量，像太陽一樣！」
而作為總監製的劉偉強昨日受訪時直言大感榮幸：「今次邀請藝人嘉賓個個一呼百應、義不容辭，大家都好投入咁去做，好開心能夠同佢哋合作。」另外，他將為下月8日舉行「第十二屆殘疾人運動會」策劃開幕禮，打造出溫馨主題。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
