大埔宏福苑前日（26日）發生奪命大火，多位藝人主動協助紓解災情，包括男團ERROR成員193、保錡、男團MIRROR成員Frankie深宵運物資及先後留守支援中心，又有江若琳丈夫Oscar位於大埔嘅食店通宵開放兼提供免費飲食等，當中亦有大批藝人不斷更新轉發大火社區支援資訊，包括歌手張敬軒。今日（28日）凌晨，有網友晒出一個印有「from Hins and HCFC」嘅信封，原來係張敬軒發動歌迷會，積極搵出受大火影響嘅粉絲，為災後支援盡綿力支持，暖人之舉隨即獲網友瘋傳大讚。
張敬軒向來有「圈中善長」之稱，多次於天災人禍、藝人遇困時伸出援手，今次佢就率領歌迷會，上門為本居於宏福苑嘅粉絲送上祝福，令粉絲感到無限暖意，感動流淚，將愛心傳遞出去，本身低調行善，依家變為網上佳話。
有肇事災難者網上發文，詳細公開獲溫暖慰問嘅經歷：「今日忙亂之中收到陌生來電，原來係張敬軒歌迷會嘅職員打嚟，話見到我喺歌迷會登記嘅地址，知道我係受災居民，所以想略盡綿力給予支援。見到面嘅時候忍唔住喊咗出嚟，呢兩日唔食唔瞓，安頓家中老人、幫街坊處理資訊、整理有用資料，完全冇時間處理自己情緒，嗰一刻有人關心自己，啲眼淚忍唔住。感謝張敬軒嘅心意，感激H-Crew嘅奔波，你哋嘅付出令我喺無情嘅大火感受到溫暖，我會將呢份愛傳遞出去。」
唔少網友見到發文，都留言力讚張敬軒：「我都覺得軒會關心呢件事 低調做要做的事 從來係佢作風」、「真係黐線 無想過會搵歌迷地址 好暖」、「睇到喊出嚟 鍾意張軒真係未失望過」。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
