曼聯大部份時間踢多個都要輸。(Getty Images)
周二(25日)凌晨英超驚現離奇紅牌事件！曼聯主場對愛華頓一戰，客隊嘅伊祖沙古爾同米克堅尼上演「鬼打鬼」鬧劇，結果出手掌摑自己友嘅古爾被逐離場。曼聯雖然大部份時間踢多個，但表現患得患失，最終0比1輸畀10人應戰嘅愛華頓，咩面都冇晒。
曼聯近2個月成績回勇，賽前已經5場不敗，開波13分鐘更意外「收大禮」。愛華頓嘅米克堅尼同古爾喺一次防守後出現爭執，米克堅尼邊鬧邊推，古爾沉唔住氣出手摑對方一巴，結果被球證出示紅牌，兩人之後仲繼續互相指罵，要隊長比克福特將古爾拉開。
愛華頓一早踢少個，不過29分鐘反而先開紀錄，達斯貝利賀爾推至禁區邊起腳轟入死角。曼聯傾力反撲，但欠缺破密集板斧，加上比克福特屢救險球，最終曼聯輸0比1。領隊魯賓艾摩廉表示：「我講過曼聯仲有好多嘢要執，唔想特別指明，總之我哋就係踢得唔好。」
幾乎做紅牌罪人嘅古爾，賽後發文道歉：「我先向米克堅尼道歉，我為自己嘅反應負全責，我亦要向隊友、職員、球迷、球會致歉，今次事件唔反映我嘅為人，只係當時情緒高漲，我會確保呢件事永遠唔再發生。」
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
