藝人黃宗澤（Bosco）與蔡少芬（Ada）等日前為新劇《風華背後》開工，Ada與Bosco於劇中本有曖昧戲，但Ada不欲「污染」純真友誼，決定全刪掉！Bosco前妻一角由王丹妮飾演，他指是自己親自挑選，讚對方夠高、夠霸氣，啱晒角色！
邵氏新劇《風華背後》正拍攝得如火如荼，日前Bosco、Ada、鄭希怡（Yumiko）、林愷鈴和譚耀文在尖沙咀某酒店總統套房開工，事隔8年再拍港劇的Ada，在劇中跟Yumiko對着幹，當日拍攝的戲份是兩人真情剖白，哭訴心聲，結果齊齊喊出真眼淚，大鬥演技，Cut機後眼淚都繼續流，Ada更不停拭淚，受訪時笑言自己是演技派，喊戲冇難度，Yumiko則表示排戲時望着Ada已經好感動，「戲」場十足。
Yumiko被爆有激情戲
雖然喊戲Easy Job，但Ada直言今次拍劇壓力很大，特別這場戲前一晚才收到兩頁紙的劇本，擔心到喊驚：「我死背爛背，記唔到，記唔到呀！」Yumiko則整蠱對方說：「Ada講好多對白但又好流利，證明好適合長對白，寫多啲畀佢。」Ada反擊：「你個口好毒，果然同我唔妥吖！」Ada透露Yumiko劇中有不少性感激情戲，雖然Yumiko指尚未知道，但Ada搞笑續說：「我就長對白，你就性感尤物，各有擔當」
Bosco於劇中有一位律師前妻，劇組一直保持神秘，未有公開由誰飾演，探班當日，Bosco終揭盅，原來由拍開電影的王丹妮飾演，王丹妮入行至今只客串過劇集《那年盛夏我們綻放如花》及迷你劇《苦力》，故今次為《風》劇演出可謂相當驚喜！Bosco笑言王丹妮是由他提議，主要睇中王丹妮的台型，他笑謂：「呢個角色唔能夠太柔弱，如果行出嚟唔夠高就死搵糖妹就大鑊。」他還大讚王丹妮除了有電影感，記性亦非常好，透露日前拍了一場法庭戲，需臨時改對白，王丹妮亦可以即背即拍完全冇NG，非常犀利！
Bosco於《風》劇與Ada搭檔，於熱播台慶劇《新聞女王2》就跟佘詩曼（阿佘）鬥嘴鬥戲，演奸角更獲得不少觀眾讚賞，問他會否想憑《新聞2》衝視帝？他則表示：「獎項冇所謂，只要觀眾睇得開心就得喇。」而他每逢開工都會帶備自家湯水分給台前幕後，拍攝當日都有派湯，更為Ada準備專屬湯壺，認真細心，Ada亦表示好感動，讚好有心，笑謂拍劇雖然辛苦，但皮膚依然靚全靠Bosco！提到跟Bosco在劇中自小一起長大，情同「兄弟」般，Ada笑言本來劇本有曖昧情節，但全都被她刪掉，兩人還不約而同認為男女是可以有純友情，Bosco謂：「我自己都有好多異性朋友關係好似兄弟咁，蔡潔都係其中一個，男女唔一定只有愛情嘅。」
林愷鈴單戀Bosco 重拾少女情懷
藝人林愷鈴於《風華背後》中單戀Bosco，自言將自己少女時代單戀男生的感覺投射在劇中，非常有趣。談到今次拍劇有甚麼難忘事，她笑言：「今次拍劇最開心係同朱茵演母女，因為我細個好鍾意睇周星馳嘅電影，當時覺得朱茵好靚，係我心目中嘅女神嚟。」
至於久未拍港劇的譚耀文指自己短短一年接了《正義女神Themis》和《風華背後》兩部劇，在《風》劇飾演蔡少芬（Ada）前夫，兩人多年無合作，今次有重聚感覺，但笑言劇中經常被對方恰，但他就對Ada好癡纏，他說今次接劇最大原因是可以「圓夢」：「我身份係『影帝』，未做過嘛！一嘗影帝身份當滿足咗，即刻接！」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
