羅渣士兩個金球打爆曼聯。(Getty Images)
周一(22日)凌晨英超，曼聯作客1比2不敵氣勢如虹嘅阿士東維拉，近4場不敗走勢告終。曼聯今場殘陣出戰下，被維拉新星摩根羅渣士兩個金球打爆，更有隊長般奴費南迪斯傷出，領隊魯賓艾摩廉透露般費傷勢嚴重，聖誕、新年快車面臨兵荒。
曼聯今場有麥比奧莫等3名非洲兵離隊，面對狀應巔峰嘅維拉上半場仍頂得住，雖然摩根羅渣士喺45分鐘轟入世界波，但馬菲奧斯根夏隨即趁維拉後防犯錯，窄位射入追平，半場踢成1比1。不過般奴費南迪斯喺完半場前拉傷，被逼提早退下火線。
換邊後曼聯無以為繼，57分鐘再次被摩根羅渣士喺左路扣大位轟入遠柱；曼聯力圖反撲，但後備席並冇具份量替補，尾段只能用18歲嘅積克費查同拉斯救亡，最終都返魂乏術。曼聯輸波後繼續排喺第7位，近11場聯賽第2度落姻。
曼聯輸波兼折將，賽前已有中場明奈小腿受傷，據報可能要抖數個星期，依家連般費都傷埋，艾摩廉透露：「我唔想討論我控制唔到嘅事，般費係軟組織出現問題，相信要休戰一段時間，我唔肯定。」達洛治就話：「好大鑊！我唔知有幾差，但般費不嬲都係鐵人，佢傷出就知有麻煩。」
麥比奧莫、阿密特迪亞路、馬沙拉奧3主力去踢非國盃，明奈同般費亦接連受傷，加上哈利馬古尼同馬菲斯迪歷特仲養緊傷，嚟緊聖誕、新年快車有排捱，艾摩廉表示：「我哋要克服個問題，但唔會喺1月轉會窗為買人而買人，我哋一早已有計劃，唔可以因為急於買人而犯錯，我哋會盡力搵解決方法。」
足球博彩神器，每日重心提供盡在《彩報》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
