當大會頒發完「最佳劇集獎」予《新聞女王2》後，由電視廣播公司主席許濤發言：「大家好，首先我哋大家再一次恭喜今晚所有得獎嘅台前幕後，而家頒獎禮嚟到最後一個環節，而今年我哋特別增加咗一個獎項，萬千星輝榮譽傳奇大獎，向一位傳奇級嘅人物致敬。呢位重量級嘅人物，喺過去幾十年，為TVB作出咗重大嘅貢獻，其實唔止係TVB，甚至乎喺全港嘅演藝界，佢一直都係出心、出力，佢演出過，佢製作過嘅作品，為香港嘅市民帶嚟過無數嘅歡樂，佢亦都提拔咗一代有一代無數嘅演藝界人才無論係過去，現在，或者將來佢都永遠會係TVB最重要成員之一！講到呢度，呢位得獎者應該都呼之欲出㗎啦，但係，等一等，我哋準備咗一條片，正式咁同大家宣佈，大家睇睇片。」之後螢幕上播上一條由王祖藍旁述，回顧其整個演藝生涯的短片，歌頌他對影視界及TVB的貢獻。
之後由好友譚詠麟頒發這個獎項，他表示：「曾志偉係我所認識嘅朋友入面，最唔守時嘅一個，因為佢可能係交遊廣闊，或者係百足咁多爪，佢一瞓醒之後就周圍約人，所以想見佢直程好似睇街症咁。而且呢，佢每一個會都唔會限時間，所以一個遲咗之後可能下面嗰啲就好遲，一路褪，所以成日都唔守時，仲有佢會自己打電話話俾你聽，我而家轉過彎嚟㗎喇，呢個彎叫大亞灣其實我都好奇怪，智慧，點解無線總經理呢個職位，真係好劇腳， Kim責任重大，點解會做嘅呢？我問佢，佢就話俾我聽，唔知點解我覺得TVB好似係我嘅初戀情人咁樣我一定要返嚟幫佢，就係憑着呢種信念，佢竟然會每一次開會，八點前就得喺度，亦都係佢呢種咁嘅堅毅，令到綜藝節目有聲有色，大家有目共睹。有一日如果大家喺街嗰度見到志偉，不妨走埋去同佢講聲，曾生，多謝你，多謝你咁多年為我我哋做咗咁多好嘅節目，智慧係一個好眼淺嘅人，喺嗰個moment，佢就會兩行眼淚，喊到收唔到聲，好似老人家蕩失路咁，智慧，今日容許我喺度，以觀眾身份唱隻歌俾你聽好冇？」然後譚詠麟唱出《朋友》，全場藝員同事為曾志偉站立鼓掌。
曾志偉發表感言，他說：「多謝多謝多謝！除咗多謝都係多謝大家，好多謝大家，想同大家同事講，你哋可以坐低，唔使一定企起身，好多謝大家嘅尊重，好多謝你哋。公司今次頒呢個獎俾我，我好多謝好多謝公司，因為呢個係一個新嘅獎，叫做『榮譽傳奇』，我覺得呢個獎最特別嘅就係last個字——『奇』，奇就奇在五年前我答應嚟做經理呢個位，我同朋友研究過，佢哋猛咁同我講，話電視係一個夕陽嘅行業，唔做唔輸，唔好衰收尾啊志偉。但係我回心一諗，我從影50幾年，其實我好多所見所聞，所學所做，我係好想同我哋嘅同業分享，返嚟TVB我就係呢個目的。第二就係話，其實我行勻成個世界未見過一個電視台好似TVB咁，超過八成嘅電視觀眾，係睇緊同一個電視台叫TVB， TVB唔只係一個電視台比娛樂大家，係堅乎社會責任。就係因為咁， TVB先至有我哋唱歌嘅東張西望，每日每夜同我哋香港人伸張正義，好難得，我哋做一啲節目，係為我哋中年人比個平台佢哋去追夢，中年好聲音，如果有音樂夢嘅可以有星夢可以有星秀，仲有我哋為大家介紹國內所有發展，有花哥嘅無窮之路，呢啲種種嘢都係想同我哋社會去連接，去比正能量。大家希望大家喺香港能夠收到一個正能量嘅訊息，呢個係TVB要做嘅嘢，呢個就係我哋聯同TVB所有同事一齊肩負嘅責任。五年嚟，得到大家支持，呢啲節目大家鍾意，喜歡，呢個係我最歡欣嘅事，去到今日，其實我都覺得自己有啲江郎才盡亦都係時候應該卸任落嚟比我哋同我一齊走嘅一輩你哋繼續再行，再將TVB發揚光大，再肩負呢個責任，所以今日，喺呢個咁難得嘅場合，我能夠攞到呢個獎亦都係我同大家講，我係需要喺呢個職位裏面暫時退落嚟，不過通常攞獎都會多謝一啲人，我都唔例外，第一個我要多謝嘅係呢五年嚟同我一齊並肩作戰嘅我哋所有TVB嘅同事，有你哋，呢五年先做到呢啲節目，多謝你哋！第二個我要多謝嘅係，其實喺台慶喺所有大型節目大家都會睇到，我係不斷話俾大家聽，其實TVB係有一班喺度做咗10年、15年、20年，不斷努力，但係默默耕耘都可能冇名，但係今日能夠企喺度成為大家所鍾意嘅藝人，其實佢哋係輔助好多好多辛酸，付咗好多努力，成為今日嘅藝人。有佢哋先有今日嘅TVB，先能夠提供更多娛樂俾大家，好多謝各位藝員同事！最後當然要多謝，其實五年來你話辛唔辛苦，當然辛苦，但每一次無論我喺外國返嚟或者我喺街行緊，有人行返轉頭揸住我隻手話曾志偉多謝你，我話多謝我咩啊？我唔識佢㗎喎，佢話好多謝你帶咗咁多好睇嘅節目俾我哋，帶咗歡樂俾我哋，淨係呢句說話，就已經喺呢五年我喺TVB做嘢嘅動力，所以有需要多謝每一位香港嘅觀眾，多謝你哋，希望你哋繼續支持TVB，多謝！」最後他向全場鞠躬！
.
本文作轉載及備份之用 來源 source: http://www.hk01.com
|
鍾意就快D Share啦！
|
|
|
