現年64歲的歌神張學友刷新個人紀錄完成324場巡唱，他對於成為「失業大軍」感失落，但受訪時盡顯「六十而耳順」的大智慧，親自拆解欠債及健康響警號等傳聞之餘，又提及猶如「失蹤人口」的太太羅美薇，連歌手大忌走音亦毫不避忌，一次過滿足網民的八卦心態。
張學友於2023年6月在澳門啟動《60+巡迴演唱會》後，重返紅館舉行共20場終章場。歷時兩年零七個月、累積共324場的巡唱前晚舉行尾場演出，騷上學友表現得依依不捨，開場不久就說：「大家好嗎？我麻麻哋今日完咗就失業，但會好快搵番工作做，大家加油！要努力搵錢，因為好快會開下一次。」每場例牌表演一字馬的他，臨別加碼派福利首次派心，笑言不是個唱而是大合唱演唱會，又說：「因為你哋會走音，我都可能會。」以自嘲回應失準之說。
他與太太羅美薇下月15日將迎來結婚30周年，巡唱期間夫婦相聚時間減少，但太太及細女原來有秘密入場，難怪他在台上公開多謝妻女一直的支持。學友透露與兩個女兒多以電話聯絡，因女兒在外國讀書多說英語，令他亦因此學會外語。
自揭多次暈倒
由於是最後一場演出，學友唱到最後一秒，Encore唱了13首金曲，更許願將來舉行金曲演唱會。演唱會至晚上11時15分完騷，學友依然保持狀態，在後台受訪時滔滔不絕。他重提在馬來西亞開騷時因耳水不平衡跌倒，首度大爆驚人消息：「第一次畀人見到，冇畀人見到其實跌倒好多次，暈眩對唱歌冇影響，郁動就有影響。綵排時冇事，化妝時開始暈，若然要取消演唱會影響好大，要付出代價，所以博一博。嗰次喺斜台跣低，又死要面撐起身繼續唱，有一刻都覺得自己行得太近台邊。」對於之前有網民指他手掌發黃，擔心他有隱患，他叮囑各人放心：「係畀拜神啲香染咗色啫！」
學友暈倒後仍繼續開騷，惹來欠債的揣測，他大爆金句：「其實我好慳，有儲錢習慣，不過解釋變咗掩飾。我冇借錢習慣，知道出嚟一定有人講，阻止唔到亦無法控制。」他表示從沒想過舉行超過300場演唱會，又透露曾考慮在啟德主場館舉行巡唱終章，雖然場地夠大又有新鮮感，但遭他否決：「上去睇過，唔適合我個騷。」
至於問到可考慮「四大天王」合體舉行演唱會？他反問：「點解你會想見啲全部老晒㗎？」又覺得「四大天王」已成過去，直指這個尊稱只是一個年代：「其實邊度仲有『四大天王』呢件事，大家都分開晒去發展，我唔想停留喺嗰個時代。我冇叫自己做『四大天王』，當時嘅樂壇、傳媒係咁講，佢哋好叻，可能『四大天王』個名易記啲，我寧願留喺美麗嘅感覺同回憶。」而未來的日子，他會先考慮演音樂劇，若一切順利，籌備兩年就可成事，又謙稱未必能打破契爺胡楓94歲仍開騷的紀錄。
「鐵粉」Stephy行孖咇睇足4場
張學友紅館演唱會尾場吸引不少圈中人捧場，當中鄧麗欣（Stephy）偕台灣男友Bryan激罕拍拖現身成為焦點，排排坐任影唔嬲，場內還有邱淑貞與老公沈嘉偉、庾澄慶、曾志偉、鍾鎮濤、狄波拉、葉童與老公陳國熹等。Stephy昨晚在社交網撰文，自言8歲開始已視張學友為偶像，今次巡唱共看了4場，受歌神的毅力所感動，她表示：「能夠看到巡迴演唱的最後一場，實在太圓滿感動，我看到差不多第3、4首歌已經熱淚盈眶。」
完騷後，曾志偉到後台接受學友捐贈的130萬善款支票，學友當眾問他為何辭任無綫高層，見慣大場面的他被殺個措手不及，立即將咪交還學友，之後笑說：「咪為咗嚟睇學友演唱會囉！學友好好，我返TVB嘅第一年港姐（競選）就嚟幫手做嘉賓。」學友玩大踢爆：「佢同我講做一年，點知……」場面搞笑。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
