卡域克「坐正」民望極高。(Getty Images)
卡域克勢成曼聯真命天子！「紅魔鬼」換帥後再做好戲，繼上場擊敗曼城後，周一(26日)凌晨英超再以3比2絕殺「1哥」阿仙奴，看守領隊卡域克回歸領軍兩場，就連贏聯賽1、2名球隊，係英超16年來首次出現。卡域克執教曼聯5戰4勝1和戰績彪炳，又有紅魔DNA，「坐正」呼聲前所未有咁高漲！
曼聯今場用番上場對曼城嘅勝利11人，早段處於劣勢，29分鐘有利辛度馬天尼斯擺烏龍而落後。不過阿仙奴8分鐘後「送禮」，麥比奧莫截到蘇比文迪自殺式回傳，扣過門將大衞拉耶射入。曼聯追平後信心大增，換邊後5分鐘，柏德列多古禁區外炮彈式射門，轟中楣底彈入。
阿仙奴落後即變陣搶攻，84分鐘由米基爾馬連奴喺角球混戰中射成2比2，但曼聯士氣未被打沉，3分鐘後馬菲奧斯根夏中路推進，離門廿幾碼熨射貼柱而入，為曼聯3比2絕殺阿仙奴。曼聯成為近2年來，首支單場攻入阿仙奴3球或以上球隊，亦係球隊近5年來首次作客擊敗榜首球隊。
卡域克喺2021年首次出任曼聯臨時領隊，領軍3場有2勝1和，當時就曾擊敗阿迪達領軍嘅阿仙奴；今次重掌帥印，卡域克又砌低哥迪奧拿嘅曼城同再次擊倒阿仙奴，合共5次帶隊有4勝1和佳績，即被睇好可以效法18/19球季嘅蘇斯克查，由看守領隊「轉正」做正式主帥。
卡域克賽後表示：「我唔會得意忘形，嚟緊仲有更加重要嘅比賽，因為『下場比賽』永遠都係最重要。關於曼聯個帥位，我唔會每個星期都答一次；我依家好享受，亦會繼續盡我所能去做好，我哋唔會睇得太遠，用依家累積嘅能量同信心去繼續做好自己。」
足球博彩神器，每日重心提供盡在《彩報》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
