電影《鏢人：風起大漠》官宣定檔2026年春節檔上映，豪華演員陣容包吳京、李連杰、梁家輝、張晉、于適、董思成、文俊輝等共同出演，覆蓋多代動作演員與新生代力量。此片號稱係袁和平「畢生武指功力打造」，齊集頂流武俠天團呈獻全年齡層武俠盛宴，但大卡士合體自然多排位之爭，有網友就發現每位巨星藝人均被冠上不同頭銜，除「領銜主演」外，足足多咗5個名銜，更有人出Post問：「有冇人講得出”特別演出”，“友情主演”， “友情演出”，“友情客串”，同埋“特別友情出演”嘅分別？」有人指新片應改名為《友情歲月》，認真笑爆嘴。
對於本片有齊影帝、影后、武打巨星等，每人頭銜都唔同，電影預告中嘅演出列表更有每人都有特別排位，當中就有「特別演出」梁家輝、「友情主演」張晉及擁有自己一行嘅「特別友情出演」李連杰等，頭銜之細分令人摸不着頭腦。有網友就揣測係按眾人片酬及出鏡率而命名，估計「友情客串」即係冇收錢，「友情主演」即係收友情價出演，避免外人以為佢片酬只值呢個價，影響自身身價；亦有人指咁做係為咗少啲番位之爭，藝人點會唔收錢拍戲，網上眾說紛紜。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
