「Kai仔」加時後備上陣。
去片睇「Kai仔」首次喺奧脫福球場上陣
周六(24日)凌晨英格蘭青年足總盃第4圈，曼聯U18主場對打吡郡U18突然成為英國傳媒焦點，因為紅魔鬼名宿朗尼嘅囝囝「Kai仔」首次喺奧脫福球場上陣。曼聯多位高層、新主帥卡域克及教練團成員都有入場觀戰，場面非常隆重，年僅16歲「Kai仔」跳級登場，可見潛力極優厚，升上一隊指日可待。
早前短暫擔任曼聯看守領隊嘅費查，返回原有崗位率領曼聯U18比賽，觀眾席上「星光熠熠」，包括朗尼夫婦、曼聯技術總監韋確斯、招募總監韋維爾，一隊主帥卡域克及活基治等4位教練團成員，猶如大戰，相信眾人都係等緊「Kai仔」表演，佢今場先擔任後備。
兩隊法定時間打和0比0，進入加時之後，司職翼鋒嘅「Kai仔」終於披甲，雖然佢冇波入，但勝在好腳頭，最終曼聯U18贏2比1，打入16強將會對牛津聯U18。
卡域克繼日前去睇曼聯U21比賽後，今次又捧U18場，似乎想提拔更多潛力新星，佢話：「我非常支持小將們，所以入場睇波，我好幸運年青時期，曾經為韋斯咸捧青年英足盃冠軍，呢項賽事對於曼聯呢種大球會亦非常重要，令年輕球員可以一步一步向上提升，我哋會全力支持及幫助佢哋。」
「Kai仔」5年前加入曼聯青年軍，被譽為紅魔鬼最有前途嘅未來新星之一。值得一提，朗尼未滿17歲就為愛華頓一隊入波，「Kai仔」盡得爸爸朗尼優良遺傳，即使現年只係16歲，相信好快有機會為曼聯一隊披甲。
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
