前無綫藝人張達倫（Max）於2022年約滿離開效力18年的無綫，並曾於其他電視台及影壇發展，惟早前影視界寒冬，張達倫依然保持極佳狀態，日前就拍片分享減壓心得，仲自爆原來曾經歷長達7年面癱折磨，表情控制唔到，佢都依然面對逆境。
張達倫本分享健康心得，更自爆：「從面癱7年到每天晨跑，我靠跑步找回自己。」佢保持「狀態在線」全靠3樣嘢：「早睡、跑步、堅持」佢坦言自己並非天生好狀態：「生病過，崩潰過、笑不出來過，但我從來沒放棄自己，每天跑步，不是為了瘦，是為了~精神狀態在線，面對鏡頭有底氣，生活裏能扛事，跑久了你會發現，生活真的會變順，不是問題少了，是你變強了。」
張達倫面癱時期發生於入行初期，當時佢突然患上三叉神經感染，某日瞓醒發現面部麻痺，兩日後左邊面完全失去知覺及乏力，嗰那種痛楚非筆墨所能形容，佢曾形容：「塊面好似被火燒咁樣，痛到要即刻返屋企瞓喺度。」由於左邊面肌肉失控，佢連基本飲水動作都做唔到：「左邊塊面冇咗力，所以係咁流口水，有時飲水，塊面hold唔到力，一邊飲就一邊喺左邊漏，使咗幾多錢都計唔到。」佢試過西醫開類固醇令整個人腫脹難分，最終靠針灸慢慢調理先康復，雖現時已無大礙，但仍留有後遺症如「大細眼」，亦需時刻注意面部保暖，不能直接吹冷氣。
雖然張達倫已屆47歲，但佢自覺狀態比30多歲時更Fit，仲邊跑步邊拍片表示：「我都試過病、試過低谷，大家都知我試過面癱，連表情都控制唔到，但我從冇放棄自己放棄工作。」 而佢每日堅持跑步唔純粹為瘦身，而係為精神狀態在線，等自己面對鏡頭時更有底氣：「跑吓跑吓你發現幾艱難都好，生活有幾艱難都好，慢慢都會解決到。」唔少網民都驚訝佢曾有面癱經歷，紛紛留言表示當時「睇唔出」，仲好佩服佢一直演戲卻完全冇露破綻。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
