無綫小花戴祖儀、陳楨怡皆被批馬年姻緣未到，索性疊埋心水闖一番事業。在家布好「財陣」的祖儀工作接踵而來，3月將推出個人單曲，並要準備第一次演出獨腳音樂劇；楨怡則在家擺放「鹽水陣」驅走衰氣，望好運齊來，更期待有機會演繹大奸角。
藝人戴祖儀與陳楨怡同是單身女神，昨日趁着農曆正月十五元宵佳節，相約吃飯傾吓偈。祖儀表示過年會跟隨傳統跟家人出動拜年，談到有沒有被問及婚事時，她稱親友不會催婚，不過父母則非常關心她的終身大事：「佢哋都比較傳統，都想見到我成家立室，自己就隨緣，大家見我哋好似去好多唔同地方，但其實認識唔到新朋友，加上本身超摺，每日都係屋企、工作室、返工。」楨怡亦稱暫時未有被催婚的煩惱，指親友最關心她有沒有工開：「可能仲細個，未到結婚年齡。」兩女都表示今年獲師傅指點專心工作，暫不考慮感情事。
談到新一年可期望情花開，兩女皆不約而同稱不會多想感情事，專心努力工作，祖儀說：「好多師傅都叫我唔好諗感情住，話唔係呢段時間，又唔會唔開心，抱住感恩的心。」楨怡亦同樣稱不會去想感情，事業為先，認為有事業再慢慢談情說愛也不遲：「師傅都係話唔好諗感情住，自己都唔係好急想組織家庭既人，顧掂自己先。」
鹽水洗走負能量
對於擺桃花陣增強姻緣運，祖儀情願布財陣求財運，並不會強求感情，自覺單身也自得其樂，加上馬年一開始已經馬不停蹄，3月將推出單曲，加上有節目出街，並要為首次演出獨角音樂劇綵排。她說：「3月好充實，事隔多年再推出個人單曲，呢首歌喺中學寫嘅，係自己人生第一首寫嘅歌，自己聽返都覺得充滿青春回憶，係一首熱血追夢嘅歌，每次聽都熱血沸騰，希望團火能感染觀眾。」馬上要迎來突破的她不單是人生第一次演出音樂劇，更是只有她一個站在台上的個人表演：「得自己一個人，仲要唱好多首歌，會當係半個Live Music演出，加上戲劇元素，挑戰相當大，好期待、亦都好緊張，希望公演時有完美演出。」
陳楨怡則透露媽媽在過年前吩咐以鹽洗手，祈求洗走所有不好的，並將鹽水和硬幣的「鹽水陣」放在床底下吸走衰氣，她笑說：「放咗幾日啲銀仔已經變咗綠色，應該吸乾淨晒啲衰氣。」陳楨怡去年憑台慶劇《巨塔之后》演繹反叛千金「王啟心」令觀眾留下印象，希望馬年會遇上奸到出汁的大奸角，有淋漓盡致的發揮，她說：「自己覺得王啟心唔算係壞人，只係掛住復仇，性格同處事比較直。所以好期待有機會做一個超級大奸角，可以奸到盡，奸到一個眼神已經令人覺得恐怖。」
場地：香江花月（佐敦）
本文作轉載及備份之用 來源 source: http://hk.on.cc
|
鍾意就快D Share啦！
|
|
|
