遭TVB封殺永不錄用 于洋：唔要我咪唔做囉
于洋在訪問中直言，當時「企硬唔拍」非一時衝動，而是為了捍衛「合約精神」。他回憶拍攝《鬼咁夠運》時，葉德嫻飾演他的妻子，梁朝偉則演他的兒子；當時還有十日戲才完成拍攝，但一直未獲公司傾續約，令他極度不滿，決定「走佬」罷拍。于洋說：「因為嗰啲揸Fit人寸，揸住雞毛當令箭，你咁我咪咁囉。又唔同你傾約又唔同你講，大安旨意以為你一定續，咁無意思。」 于洋索性開出「出面（拍電影）價錢」反擊：「使乜畀面呀？大家都咁高咁大。你出糧畀我，我要付出，你唔要我咪唔做囉，冇所謂，嗰陣我生活OK唔擔憂。」
罷拍葉德嫻讚：于洋好嘢！
最終老闆下令封殺，楊紹雄笑指對方因為「靠山」而逃出生天，于洋笑笑口否認說：「唔係有靠山，我哋係講理由，做人要始有終，你客客氣氣咪大家好，又招積，唔出聲，嗰陣後生血氣方剛，條氣咪唔順。況同嗰陣我嘅心態冇所謂，純粹係玩，有咪拍，冇咪唔拍。葉德嫻都話我做得啱呀，于洋好嘢！」
薛家燕成百樂「高山青」迎事業第二春
除了火爆往事，于洋亦提到與「舊情人」薛家燕的陳年緋聞。兩人原是中學同學，當年家燕姐是校花，他亦有好奇追看明星，被問有否追求家薛姐，于洋說：「咩叫追啫，咁大家後生仔約埋去Party，去唔去呀，咁咪去囉。」多年來二人只是朋友，但情誼未有消失，1998年于洋正是受薛家燕邀請，才決定從加拿大回流香港接拍《真情》。憑藉「高山青」一角，迎來演藝事業第二春，一拍數年，他形容這段歷程是「喜戲人生」。
享受加國「湊孫」生活 拒復出拍戲
于洋曾三度回TVB拍劇，他早在70年代移民加拿大開餐館，卻因戲癮難耐，多次選擇隻身回港發展。當年他住在窩打老道山，眼光獨到的他早年以十多萬購入單位，移民時已升值至約六十萬，加港兩地都有物業。
直至2020年約滿TVB才正式退休，于洋現時在加拿大弄孫為樂，擁有可愛的混血孫兒。他笑言太太非常支持他退休，更對他獨自回港工作多年投以百分百信任：「佢話我後生乜嘢都見過，要走後生都走咗」 對於會否復出，于洋帶點猶豫：「而家年紀大，太辛苦嘞，捱更抵夜依家年紀頂唔住，返去湊下孫，除非真係好好玩，唔辛苦都可以玩下。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
