拐杖男與警員舌戰及警員取起電動行李篋。
社交平台瘋傳一段影片，一名手持拐杖、身穿綠色上衣的男子，攜帶一個銀色電動行李篋在一港鐵站內，他被多名職員及警員截停。影片開首即見火藥味濃，一名警員高聲向拐杖男稱：「我話畀你聽𠵱個唔係輪椅，你聽唔聽到，你話係輪椅就輪椅呀！你話係呀！你有冇搞錯？你個腦係咪有問題呀？」，拐杖男態度輕佻回應警員：「你個腦有問題呀，輪椅都入得，我呢個唔入得呀？」，其後，警員取起電動行李篋放在欄杆上，並向圍觀市民稱:「咁多位街坊，你話畀我聽呢個係咪輪椅？」拐杖男又稱：「我𠵱家拖篋咋喎！我𠵱家拖篋咋喎！」，其後手指警員：「我𠵱家唔係輪椅！」，警員向他稱：「你唔好再同我強詞奪理喇！」。
一名身穿黑衣女子問拐杖男：「係咪電動呀？」，柺杖男辯稱：「我閂咗咪唔係電動囉！」，另有一把男聲稱：「危險呀！」，拐杖男反駁：「危險，咩危險呀，國家出呀，3C法例呀，我搭飛機去加拿大來回都得呀....明唔明呀！....嗰個唔合格，呢個合格呀！」，此時，警員再三向拐杖男稱：「呢張唔係輪椅！」，拐杖男怒稱：「我𠵱家拖篋、我𠵱家拖篋、𠵱家拖篋」；警員向他稱：「我頭先叫你細聲同我講嘢，你點呀？」，拐杖男反問警員「咩呀！你嬲呀？唔啱咪告我喇，告我喇，告喇告喇，你鍾意就告喇！我要法官，我要問法官，議員我問咗兩個喇，議員叫我等...我要搞大佢，登報紙，個個都係傻嘅！」；其後另一名警員上前勸拐杖男冷靜，他稱「返屋企咪冷靜囉！....你𠵱家唔畀我行呀！」片段亦至此完結。至於事發日期、地點及後續發展，目前均不詳。
鑑於電動可移動工具潛在的火警風險，為鐵路安全帶來的挑戰，港鐵經過審慎的風險評估後，於2026年1月1日起，禁止乘客攜帶電動可移動工具進入港鐵範圍，包括電動單車、電動單輪車(俗稱風火輪)、電動滑板車、電動平衡車、電動滑板及電動行李箱等。使用電動輪椅的殘疾人士，則會繼續獲豁免有關規定。港鐵會加強留意有關情況，亦呼籲乘客自律及遵守相關規定。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
