組合MIRROR成員呂爵安（Edan）將夥拍視后李佳芯翻拍日本神劇《悠長假期》，挑戰演出木村拓哉角色，他昨日在發布會上喊驚，並反問：「係咪玩我？」至於另一成員盧瀚霆（AL）則在港版《金秘書為何那樣》中演朴敘俊的「霸總」角色，二人均不敢挑機超越日韓兩大男神，網民更是一面倒睇淡。
ViuTV昨日舉行10周年午宴，人氣男團MIRROR、ERROR、女團COLLAR、樂隊ROVER等總動員現身。現場宣布多個劇集及綜藝企劃，當中最受矚目是翻拍日本「神劇」《悠長假期》及韓劇《金秘書為何那樣》。
Edan將夥拍早前離巢無綫的視后李佳芯（Ali）演出港版《悠長假期》，分別飾演木村拓哉及山口智子的角色，至於男二竹野內豐的角色則由AK演出。台上，Edan拿着劇中的經典彈彈波亮相，他自嘲：「收到呢個消息都打個突，Edan做木村，係咪玩我呢？都驚同大壓力，呢套係經典嘅神劇，但絕對係一個好嘅機會，有同導演講希望拍一套有港版特色嘅《悠長假期》。」問他會否參考木村的演出時？他坦言：「同佢唯一相似就係大家識彈琴，原著太犀利，我冇可能Copy。（從演以來壓力最大？）係，但對班底有信心。」Edan期待跟Ali擦出火花，大讚：「同女神合作當然好開心。」而Ali回覆本報表示很喜歡這部劇作，對角色很感興趣，但細節還需要傾談。
AL演霸總 唔敢媲美朴敘俊
至於韓星朴敘俊與朴敏英主演的《金秘書為何那樣》，港版由AL及COLLAR成員Ivy So出演，是AL相隔3年後再演「霸總」，他自言今次角色調皮有趣，問他覺得跟朴敘俊是否相似？他謙稱：「外觀唔似，佢成熟啲同靚仔過我好多。」說到有一場戲要由客廳咀到入房，他說：「盡量會跟原著，但實質會跟幾多就靠圍讀」提到他之前在澳門開騷時被發現下體晃動犀利，疑沒有穿內褲，他解釋：「呢個係生理課，我係一個男性，地球有地心吸力。知大家有好多揣測，但我當日有着內褲，平時都唔會唔着。（下次更注重衣着？）當日條褲已經係啡色，唔係淺色褲，所以冇得避，呢個係性別特徵。」
有關翻拍的消息曝光後，網民一面倒認為ViuTV自掘陷阱，因為《悠》劇太經典，木村亦難以超越，紛紛替Edan擔心，甚至懷疑他被公司整蠱，連Ali亦被網民批評欠缺山口智子的傻大姐氣質，又指AK「完全高攀不起」竹野內的靚仔及不覊風格，亦有指AL飾演「霸總」格格不入，指他欠缺貴氣。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
