卡斯米路頂入先開紀錄。(Getty Images)
周二(28日)凌晨英超，曼聯主場2比1擊敗賓福特，依家甩開第6位嘅白禮頓11分，周日(3日)對利物浦有望提前鎖定下季歐聯席位。曼聯即將重返歐聯舞台，但卡斯米路離隊會係重大損失，呢位巴西國腳今場交出20年未見巔峰數據，賽後球迷、球員同媒體齊呼「留多1年」，場面感人。
今場兩隊互有攻守，不過曼聯把握力更強，11分鐘靠角球攻勢領先，哈利馬古尼頭槌二傳，由卡斯米路近門頂入。賓福特之後搶攻，但曼聯完半場前靠反擊入多球，班捷文施斯高接應般奴費南迪斯妙傳射入；賓福特完場前由馬菲亞斯贊臣破蛋，但無阻曼聯贏2比1。
曼聯贏波後有61分排第3，最後4輪贏多1場就鎖定前5位置，實現重返歐聯嘅目標。領隊卡域克賽後表示：「我哋依家處於好好嘅位置，希望得到盡可能高嘅排名，球員嘅士氣、努力同團結都一流，喺呢個咁困難嘅聯賽拎到咁多勝仗，我非常開心。」
34歲嘅卡斯米路今場成為主角，已宣布季尾約滿離隊嘅佢，今場攻入第9個英超入波外，仲交出11次攔截、9次解圍同16次爭搶成功嘅數據，Opta顯示係20年來第1個喺英超做出呢個全能數據球員，11次攔截亦係卡斯米路歐洲賽生涯第2次做出，相當恐怖。
卡斯米路入波後，3度親吻波衫上曼聯隊徽，完場後奧脫福球迷齊高呼「留多1年」，今場因傷缺陣嘅馬菲奧斯根夏，同樣喺社交網留言「留多1年，卡斯米路」，前曼聯球星艾拉亦呼籲：「曼聯要慎重考慮畀2年約卡斯米路，佢為球隊注入冠軍DNA，佢嘅經驗對重建嘅球隊好重要。」卡斯米路離場時深受感動，一度落淚。
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
