前香港小姐冠軍楊思琦曾與李泳豪拍拖多年，分手後一直背負貪慕虛榮之名，直至近日泳豪與胞兄李泳漢鬧不和，間接為受屈多年的思琦洗白。昨日思琦首度開腔談及李家風波，直言事情已過去15年，呼籲給予李家空間。
藝人李家鼎前妻施明早前離世後，爆出孖生兒子李泳漢與李泳豪反目及爭產風波，成為全城熱話。曾與李泳豪拍拖長達9年的楊思琦，卻因今次風波間接成為最大「得益者」。當年思琦跟泳豪已同居兼達談婚論嫁階段，但女方於2011年單方面宣布分手，並爆出與前內地跳水運動員吳帥交住並已懷孕，思琦被指因拜金而移情別戀，其後更遭李家上下聯手唱衰，泳漢狠批她是「披着羊皮的狼」，更羅列其罪狀，包括在李家白食白住、將泳豪當傭人及叫施明「食屎」等。思琦當年曾哭訴分手導火線是跟施明及泳漢難以相處，指二人視她如同空氣，泳漢不務正業，要她與泳豪負起李家的經濟重擔，更曾目睹泳漢差點把泳豪的手打斷等。不過，當年網民一面倒相信李家，令思琦飽受網絡欺凌，形象一落千丈，惟有轉戰內地搵食。思琦為養育一對子女，近年變身網上博主，每晚開直播長達10多小時，有時更要深夜獻唱，自食其力。
3代同堂晒溫馨
近日隨着李家內部矛盾曝光，網民對思琦的風評180度轉變，認為引證了思琦當年所說的皆為事實，並戥她跟李家生活長達9年辛苦，網上更設「楊思琦道歉區」，大批網民留言懺悔，令受屈多年的她終「沉冤得雪」。
昨日思琦與6歲的細仔Kody及媽媽3代同堂出席商場舉辦的母親節活動，現場獲不少粉絲要求合照，她亦有求必應。她受訪時談及李家風波，坦言近日做直播時不少網民留言問她是否要爆料，她得體回應：「我冇乜要講，估唔到大家反應咁大，好多來自不同地方嘅網民留言話支持我。我初時唔知咩事，收到好多人嘅支持、鼓勵同埋善意關心。」問她是否覺得自己終得到平反？她說：「唔會刻意咁諗，時間過咗去好耐，已經係15年前嘅事，人要向前望，希望大家都向前看。（大批網民喺「道歉區」向你懺悔，會唔會原諒佢哋？）以前嘅事唔好講，只能講多謝大家支持。」
至於當年李家全家的關係是否跟現時一樣？她非常有口德，只說：「我知大家好想睇到事情嘅發展，但希望大家畀啲空間佢哋，我唔方便評論太多。（你同泳漢熟唔熟？）停留喺當年嘅階段。（你以前同泳豪拍拖咁耐，你相唔相信佢講嘅說話？）我喺呢件事上寄語佢哋加油，唔評論太多。（當年已預料到有今次風波？）冇去諗將來點，過去由得佢過去，順其自然。（你有冇聽過兩兄弟嘅錄音聲帶？）我唔得閒聽。（佢哋以前同李家鼎講嘢都係咁粗聲粗氣？）大家都係局外人，我唔方便去講。（你同泳豪分手後有冇聯絡？）大家都有各自家庭，祝福大家各自安好。（認為今次風波點樣解決？）我哋係局外人，只能講兩個字，就係加油。」談到李家鼎近日消瘦不少，思琦望對方好好照顧自己，最重要是身體健康，又指得悉施明去世的消息很不開心，望其家人節哀順變。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
