男團MIRROR人氣王姜濤在假麥花臣舉行的《Hi MIRO！Garden Party 2026》中跟約1,500位「姜糖（粉絲暱稱）」盡興，除粉絲玩得開心，姜濤本人表現更High，面上流露久違了的真摯笑容外，不時笑到肚攣，由I人突變E人，更港、台、美、韓星輪流「上身」。
他除主動要求點唱台灣偶像羅志祥的情歌外，又跳郭富城、已故美國巨星米高積遜及韓流天王阿RAIN（鄭智薰）的照牌舞步，在派花給姜糖期間，忽然癮起大跳江南Style，且扮得似模似樣，令全場尖叫。不過最令人心動是他即場大顯「撩女神功」，大會安排了4位女粉絲上台畫畫，他邊唱《夏日傾情》邊走近粉絲，又逐一挨埋身，近距離到幾乎頭貼頭，甚至半跪在粉絲面前對住唱「l Love You，你會否知道嗎，我已深愛着你…」，雖然夢寐以求的場面發生，但受寵的粉絲似乎太心如鹿撞，無法集中精神畫畫，有粉絲一度轉180度避開，亦有粉絲怕醜到掩嘴，場面搞笑。
由於玩了幾個鐘，加上姜濤要攬住粉絲合照，可能感到有點疲倦關係，他當眾「索油」提神，不過他搽藥油的方式相當特別，是整條頸360度搽勻，最後用鼻索索藥油。
活動由下午2時開始直踩到近8時半才結束，他臨走時問姜糖：「大家鍾唔鍾意呢個方式呀？有機會就…，最緊要玩得開心啫，多謝大家，希望母親節畀到份好嘅禮物畀你哋，亦都希望你哋同自己媽咪一齊食吓飯，依家唔算太夜，希望你哋日後生活都順順利利啦，依然有機會就下次再見啦，再研究吓下次有咩再好啲嘅，OK？」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
