藝人李家鼎（鼎爺）與兩名兒子最近發生家庭糾紛，曾與鼎爺細仔李泳豪拍拖9年的女星楊思琦今日（10日）現身活動時立時成為焦點，她表示近日做直播時不少網民留言問她是否要爆料，她說：「我冇乜要講，估唔到大家反應咁大，好多來自不同地方嘅網民留言話支持我，我初時都唔知發生咩事，收到好多人嘅支持同鼓勵，四方八面嘅人帶着善意關心我。」由於當年思琦跟泳豪分手時受千夫所指，近期因李家的家庭矛盾，不少網民轉風向認為思琦當年受委屈，問她是否覺得自己終得到平反時？她表示不知道：「我唔會刻意咁諗，時間過咗去好耐，已經係15年前嘅事，人要向前望，希望大家都向前看。（網民設立『思琦姐道歉區』，有大批網民向你懺悔，你會唔會原諒佢哋？）以前嘅事唔好講，只能講多謝大家支持，冇想過會有呢個道歉區。」
另外，談到鼎爺消瘦不少時，思琦望對方好好照顧自己，最重要身體健康，問到當年李家的家人關係是否如現在一樣？她說：「我知大家好想睇到事情嘅發展，但希望大家畀啲空間佢哋，我唔方便評論太多。（你同李泳漢熟唔熟？）停留喺當年嘅階段。（你同李泳豪拍拖咁耐，你相唔相信佢嘅說話？）好多人都叫我加油，我喺呢件事上寄語佢哋加油，唔評論太多。（當年已預料到有今次風波？）我冇去諗將來點，過去由得佢過去，順其自然。冇想過咁多網民支持我，好驚訝。（你有冇聽過兩兄弟嘅錄音聲帶？）我唔得閒聽。（佢哋以前同鼎爺講嘢都係咁粗聲粗氣？）大家都係局外人，我唔方便去講。（你同李泳豪分手後有冇聯絡？）大家都有各自家庭，祝福大家各自安好。（認為今次風波如何解決？）我哋係局外人，都只係能講兩個字，就係加油。」她又指收到李泳豪母親施明去世的消息很不開心，望其家人節哀順變。
而今日思琦跟細仔及媽咪三代同堂現身母親節活動，活動上思琦獻花給媽咪，3人又親親臉頰，場面溫馨。思琦透露細仔畫了多幅圖畫給她做母親節禮物，形容對方是小甜心，至於大女因學校有活動而未能到場，對方只是親了她一口，暫未有任何表示。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
