- 李家鼎一家爆發爭產風波
- 李泳漢李泳豪兄弟隔空交火
- 婚禮影片引發父子昔日熱議
【李家鼎/李泳豪/李泳漢】最近李家鼎（鼎爺）一家因為施明離世後爆發爭產風波，大仔李泳漢同細佬李泳豪隔空交火，關係降至冰點。網民食花生之餘，YouTube演算法亦令泳漢2016年的婚禮片段再度翻hit。片中鼎爺雖然話「老懷安慰」，但言談間火藥味濃，甚至曾喺訪問中當面鬧大孖「成隻浮屍咁」，父子相處模式引起熱議！
最新影片︰
李家鼎父子｜婚禮致辭變爆料大會 鼎爺：多謝各位夾錢
李泳豪YouTube頻道入面，一段紀錄哥哥李泳漢當年結婚影片近期瘋傳。鼎爺上台致辭時，開首第一句就令全場側目：「我多謝咁多位夾錢請我個仔娶太太，我都老懷安慰，等咗30幾年終於有杯茶飲。」雖然講笑性質，但今日爭產風波背景下睇返，真係令人聯想到兩父子為金錢產生很多磨擦。
當時鼎爺更在台上幫新媳婦出頭，公開「訓示」大孖，嚴令泳漢出糧後要「上繳中央」：「我唔幫個仔講說話，出糧俾啲啲？點叫啲啲？至少要俾3分2！我講嘅！」當年這番話被視為錫新抱（原來新抱仲係鼎爺嘅騎馬學生），但看得出鼎爺對大仔財政狀況一直都好「勞心」。
李家鼎父子｜爭產風波升溫 泳豪關閉留言功能
不過，昔日溫馨場面對照今日的決裂，顯得相當諷刺。近日泳漢公開指責泳豪拿了老竇300幾萬，更流出剪輯過的錄音，指細佬夫婦對鼎爺態度欠佳。鼎爺隨後表態支持細仔，更指日後百年歸老會由泳豪全權負責，不想成為「第二個施明」。面對網民湧入婚禮影片留言議論，李泳豪現已關閉該片的留言功能。
李家鼎父子｜昔日父子檔上陣 鼎爺鬧大孖「死牛咁大隻」
其實鼎爺對大仔「嚴父」形象一向深入民心。2019年兩父子返母校義賣炒飯，泳漢自豪話遺傳咗爸爸廚藝DNA，鼎爺即刻黑面窒佢：「食嘢嗰啲DNA呀？」
最經典莫過於泳漢當時自嘲「賣花姑娘插竹葉」（形容好嘢都俾晒人，自己冇份享用），即時點着鼎爺把火！鼎爺當眾拍打泳漢面頰兼心口，火氣十足咁鬧：「你唔好咁折墮，你尋日食咗啲乜嘢？前晚食生滾燉雞！仲有專機飛過嚟嘅榴槤！你仲話係賣花姑娘插竹葉？插到你成隻浮屍咁？」
鼎爺仲狠批泳漢「死牛咁大隻」，連孫仔孫女嗰份都食埋。當年睇落父子耍花槍，但對照返依家兩父子因為300萬鬧翻、大孖斥老竇被細佬操控局面，網民都唏噓呢段父子情真係「一去不返」。
相關內容︰
李泳豪兄弟︱李泳豪「家變」後受訪憶童年與泳漢愛捉弄許冠英 提起哥哥不帶恨獲讚人品好
李家鼎父子｜肥媽狂拋金句鬧李泳漢無良心 爆鼎爺曾哭崩來電「搲撈」內幕
🔥全新升級Whatsapp「升學備戰Group」選校攻略｜奪A攻略｜校園動向【馬上入group】🔥
Follow TOPick Whatsapp頻道🔔，唔會錯過熱門話題!【點擊Follow】
免費成為TOPick會員，隨時參加有獎遊戲、好物試用、會員專享活動! 立即下載HKET APP︰https://onelink.to/f92q4m
TOPick會員迎新大招募，免費做新會員送精美禮品!【立即參加】
|
鍾意就快D Share啦！
|
|
|
