港姐冠軍宋宛穎在《魔音女團》以性感舞姿先聲奪人，脫胎換骨被捧為女團大熱人選，身兼隊長的她，不諱言最初有嫌棄鄧凱文，但後來鞭策成功，令全隊追上進度。自認「得個殼」的鄧凱文卻成隊中的性感擔當，她指與其他組員以姊妹相稱，真心體會到團魂，又爆出其他組有爭拗是非。
由宋宛穎任隊長的組別「Double S」，隊員包括有鄧凱文、盧映彤和倪嘉雯，日前宋宛穎和鄧凱文接受東網專訪，宋宛穎表示隊名由當初選唱《綠野仙蹤》而得到靈感，當時「班主任」陳潔靈問她們對歌曲的感覺，就得出Sweet and Sexy，於是就誕生了「Double S」，宋宛穎笑說：「隊中3位都好sweet，我唔係呢個風格，我就做Sexy」不過團服上，偏偏最性感就交由向來有「咪神」之稱的鄧凱文穿上，宋宛穎表示：「唔係我唔肯着，係造型師度咗每個人最佳優點，最後畀咗Eris（鄧凱文），件衫係幾危險，有個shot睇到佢最吸睛部位。」鄧凱文表示比賽當日才試穿，因為瘦了點，件衫有點鬆，亦曾擔心會走光，但她笑謂：「我跳舞唔性感，只係得個殼，我係行可愛和氣氛擔當。」
宋宛穎在跳舞環節最先彈起，以第3名最高分被選為隊長，她說原本好想跟同是港姐冠軍級的倪樂琳同組，估不到大家最後都做了隊長，被迫「拆散」。盧映彤與倪嘉雯先後入組，鄧凱文是最後一位入組，鄧凱文是全班最低分，成績差強人意，宋宛穎搞笑謂：「應該冇人想你入組，太驚喇！見佢行入嚟，我心諗死喇！」鄧凱文直言當刻感到不好意思，記得自己不停講「唔好意思」，深明有機會拖低隊友成績，所以極度尷尬，她謂：「而且啱啱畀人彈唔配做練習生，喊晒，仲點笑得出？」問宋宛穎有沒有嫌棄過鄧凱文時，她坦言：「初時真係嘅！不過相處後好有火花，仲喺節目做埋CP添！」為了令鄧凱文追上進度，宋宛穎陪伴日練12個鐘，鄧凱文希望將勤補拙，不想自己成為「老鼠屎」，由於練習過度，鄧凱文跳到腳趾流膿，疑壓力太大致月事失調；宋宛穎雖然是大熱，但亦曾因壓力大，眼周爆發濕疹。
二人又互笠高帽，宋宛穎指因了解而欣賞鄧凱文：「佢心理素質好強，佢好渣，但冇放棄，同我哋練完再搵老師跳，我覺得係節目所有人都要學習。」鄧凱文則對隊長宋宛穎有讚冇彈：「好多人對港姐冠軍定型為高冷，初時對住佢都唔敢講嘢，熟落後佢個人好得意、好sweet、會照顧人，EQ高又包容，係一個好隊長，如果我加入其他Team，結局唔會係咁，佢係200分隊長。」
大家認識的宋宛穎是港姐出身，原來她13、14歲時也有女團夢，曾參加韓國公司在香港舉行女團海選，可惜屢敗屢戰都未能成功，問她視誰為最大勁敵？她謙虛表示：「我唔係好勁，未去到有勁敵，Emily（蔡華英）和Chelsea（喬美莎）就勁。」日前陳奐仁爆出有練習生加小動作搶FO爭C位，問可有勾心鬥角事件發生，鄧凱文笑指加小動作只屬策略，不算機心，自己就沒有機心，因為不介意做細，最喜歡暱在後方，「但其他組，睇播唔播聽聞有少少爭拗，但最後都和好。」宋宛穎亦有聽聞：「好似係傾唱歌，我哋就冇拗交。」
鄧凱文髮型：Galaxy Lau @ Salon Anca @ IL Colpo Group
場地：Greenhouse @ Time Square
本文作轉載及備份之用 來源 source: http://hk.on.cc
|
鍾意就快D Share啦！
|
|
|
