港姐冠軍陳庭欣月前與商人楊振源結束8年情，更由豪宅搬回蝸居，雖然被指「豪門夢碎」，但情變後顯得堅強的她十分享受現時生活，不過談到當日向父母交代分手一事時，卻忍不住哽咽。對於好友林盛斌落力介紹「筍盤」，她一於歎慢板，待完成手頭上的工作後才考慮踏前一步。
藝人陳庭欣（Toby）與「10億男友」楊振源拍拖多年，期間不斷被外界追問婚期，Toby多次表示不心急，可惜這段8年情去年底畫上句號，雙方因了解而分手，她指主因是三觀不合。Toby分手後，感情去向隨即引起關注，不少網民直指她浪費了8年青春，而早前她被拍得為前男友翟威廉慶生，又與「小鮮肉」曾錦燊傳緋聞，加上圈中金牌媒人林盛斌（Bob）於台慶夜公開誇下海口，指會承擔其終身幸福，似乎要再出Pool絕不成問題。至於楊振源則邀李佳芯為旗下品牌擔任代言人，被封「女星磁石」，雙方各自各精彩！
揀「筍盤」歎慢板
Toby日前接受本報專訪，提到Bob為她介紹「筍盤」時，她說：「佢經常問我有冇同人哋出去食飯，不過我依家拍緊劇集《警是個大佬》，當中有打拳同搶戰戲份，造型會露吓腰咁，唔好話食飯，連飲嘢都唔得！我叫佢唔好心急，等6月完成晒所有戲份先」果真「皇帝唔急太監急」。分手後的她臉上沒有半分憔悴，反而顯得容光煥發，她笑說：「好多人都係咁講，依家做自己喜歡嘅嘢，成日打匹克球，呢樣全新運動令我識咗好多新朋友，而且仲打埋比賽，所以可以話係近幾年最佳狀態，朋友話我唔同咗，可能冇咗啲無形壓力其實兩個人相處唔應該覺得有壓力，不過起碼唔可以放飛自我，要尊重對方嘅感受。」
本以為Toby對前度會三緘其口，沒想到她卻主動公開雙方目前關係：「分手係雙方共同選擇嘅，依家幾好吖，我哋絕對唔係敵人，好似早排佢知道我會喺活動做主持，佢應邀出席事前都有傳短訊話我知。活動舉行當日佢坐得好近台邊，我成日喺佢面前講嘢，完騷後大家都有傾幾句。（諗復合？）冇諗，選擇咗係咁就咁，不過世事話唔埋，都唔好講到咁死！」
對於被指浪費了8年光景，Toby雙親某程度上與網民反應相同。談及父母，向來孝順、硬淨的她忽然哽咽：「醞釀分手去到中後段我先同佢哋交代，因為唔想同屋企人分享唔開心嘅嘢……同佢哋講真係有啲難，唔想佢哋擔心嘛。前度同我屋企人關係好好，咁我老竇思想比較傳統，淨係叫我搞掂佢，唔好搞成咁，但時代唔同咗喇，上一代為咗子女啞忍，依家點會？」她指這段感情讓她成長不少，目前迎來新開始，箇中絕對有所得着。
孖「小鮮肉」出雙入對
Toby坦言有一點要澄清，就是上一段感情由始至終未有令她減少工作量，只是身邊人有所誤解。入行16年的她表示基本上未試過推Job，唯一令她覺得後悔的，就是當年婉拒參演劇集《一舞傾城》：「本來我係演文凱玲個角色，不過當時疫情，北上開工要隔離21日，好動嘅我自知好難頂得住，所以推咗。（再畀你揀過會點揀？）一定唔會再咁處理，成件事都後悔，時光倒流嘅話，我會諗啲方法出嚟頂咗（隔離），應該試咗先！」談到分手後與「小鮮肉」曾錦燊傳緋聞，Toby笑說：「為咗佢嘅曝光機會，我唔會話同佢冇發展嘅可能，哈哈！我哋喺朋友搞嘅船河上認識，發覺幾啱傾所以熟咗。依家有時同佢收廠，就逼佢順便車我返屋企，我哋住得好近㗎，佢話『敬老』喎！」
分手至今約半年，Toby形容時間過得很快，但夜深人靜聽歌時，難免有點觸景傷情。問她有否考慮找朋友同住，減少這份失落感？她說：「我適應力好強，做得呢行都想有啲私人空間。其實之前都有朋友叫我一齊住，但我婉拒咗，況且我仲有好多小動物陪伴，依家屋企又有個發生好多搞笑嘢嘅工人姐姐，都夠我忙喇！」她大爆「姐姐」的蝦碌事：「我架車有支噴霧係用嚟保濕嘅，點知有日攞出嚟噴，竟然覺得好似噴咗酒精咁，我打畀佢問搞咗啲乜，原來佢以為係蚊怕水幫我Refill，但我從來未叫過佢搞呢支嘢，依家淨係敢叫佢幫我撈沙律咋！」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
