曼聯在卡域克帶領下突飛猛進。(Getty Images)
曼聯相隔2年再戰歐聯！自卡域克執教後突飛猛進嘅曼聯，周日(3日)主場3比2擊敗死敵利物浦，提前3輪鎖定下屆歐聯參賽資格。卡域克教曼聯成績係英超之冠，更橫掃前5名所有對手，據報領隊一職由「臨時」變坐正幾成定局，卡域克就將勝利獻畀開波前不適送院嘅費格遜。
今場雙紅會前，入場睇波嘅費格遜突然不適，由奧脫福球場送醫院檢查。曼聯表現未受影響，6分鐘就靠馬菲奧斯根夏連環施射領先，14分鐘再有班捷文施斯高「疑似手球」下龍門口撞入，早早領先2球。即使般奴費南迪斯禁區內窩利射斜，曼聯仍拎住2球優勢返更衣室。
換邊後曼聯2次犯錯失波，先有阿密特迪亞路中場交失，被蘇保斯拉爾個人突襲射入；56分鐘輪到門將辛尼拉文斯送禮，後場組織直接傳畀對手，最後加普射空門追成2比2。77分鐘，啱啱續約曼聯嘅明奈禁區頂撞射破網，助曼聯戲劇性贏3比2，領先第6名般尼茅夫12分，落實拎到歐聯資格。
卡域克1月上任嗰陣，連歐洲賽資格都唔肯定拎到，但佢帶領下曼聯14場聯賽贏10場，拎到32分成績係同期英超之冠，比阿仙奴、曼城(各取27分)更多。另外，卡域克上任後連挫曼城、阿仙奴、阿士東維拉同利物浦，殺晒前5所有對手，車路士同熱刺2支Big 6亦係手下敗將。
據報曼聯若拎到歐聯資格，卡域克就會正式坐正，依家任務完成，卡域克表示：「曼聯踢出好強走勢，用唔同方法擊敗啲好強嘅對手，我好享受自己嘅工作，做曼聯領隊感覺好自然。我上任嗰陣距離歐聯好遠，依家提早3輪搞掂，係一個偉大成就。未來係點我哋再睇下。」
卡域克表示今場勝仗係獻畀恩師費格遜：「我唔知最新情況，賽前就收到呢個消息，我個人係受到好大影響，只希望佢一切平安。希望費格遜知道呢個戰果，可以為佢帶嚟鼓舞。」消息指84歲嘅費格遜並無大礙，目前清醒並進行預防性檢查。
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
