孫興民(右)下半場後備上陣。(Getty Images)
周四(25日)早上世盃A組最後1輪賽事，南韓原本只需和波，就可以出線，但卻0比1不敵南非，遭遇2連敗，被南非搶走小組次名出線席位。南韓隊長孫興民首2場分組賽表現欠佳，今仗屈居後備，佢下半場入替後，球隊反而失波，慘成「黑腳」，南韓有3分在手，能否以其中1支小組最佳第3名球隊出線32強，仍屬未知之數。
南韓主帥洪明甫對鋒線作出重大變動，正選陣容收起隊長孫興民、李在城，改用吳賢揆、 黃喜燦擔正，拍住李康仁攻堅。開賽7分鐘，南韓獲得黃金機會，李康仁禁區內勁射貼柱出界。非勝不可嘅南非企穩陣腳後，攻勢更有威脅，翼鋒馬錫高半單刀起腳，南韓中堅李基赫及時出腳擋出底線。戰至30分鐘，南非中場馬柏達遠射，被南韓門將金承奎撲出，麥戈帕近門補射，冇力度又冇角度，被金承奎接實，錯失入波良機。
南韓上半場表現欠佳，換邊後立即作出3個換人調動，包括換入孫興民，以及有德國血統嘅22歲新星卡斯洛普。兩隊都加快比賽節奏，戰至60分鐘，吳賢揆頭槌攻門，被南非門將路雲威廉斯救到，南非避過一劫，果然有後福，僅過3分鐘，由馬錫高射入打開紀錄。南韓試圖反攻，但係谷唔起，連續2場輸0比1。
南非打開今屆勝利之門，累積獲得4分，以1分優勢反超前南韓，以小組次名出線32強，南非第4度出席世盃決賽周，首次晉級淘汰賽，將會遇上主辦國之一嘅加拿大。南韓要等其他組別完成賽事後，埋單計數，先至知道能否以其中1支小組最佳第3名球隊出線。
同組另1場，賽前已穩奪小組首名出線權嘅墨西哥，收起部分主力，包括派出17歲小將基拔圖摩拉擔任正選，仍然憑馬迪奧查維斯、祖利安基洛尼斯、艾華路費度高各入1球，以3比0大勝捷克，3戰全勝，至於捷克排小組包尾出局。
免費玩Game、砌最強11人，一鍵share畀FD子打牙骹：
本文作轉載及備份之用 來源 source: http://hk.on.cc
|
鍾意就快D Share啦！
|
|
|
