現年39歲的莊思明與45歲的楊明拍拖10年，多年來被喻為圈中模範情侶，昨日終於傳來二人的喜訊，已敲定今年8月2日在馬來西亞吉隆坡的5星級酒店舉行盛大奢華婚禮，夢幻喜帖亦首度曝光，全城送上祝福。
藝人莊思明與楊明於2016年公開戀情，拍拖10年恩愛有增無減，羨煞旁人，被喻為圈中模範情侶。他們攜手走過不少人生高低，貴為馬來西亞的「拿督千金」莊思明對男友始終不離不棄，更曾公開表示「非楊不嫁」。這對風雨同路的愛侶，昨日終於傳來喜訊，敲定今年8月2日在馬來西亞吉隆坡的5星級酒店舉行盛大婚禮，一對準新人的喜帖亦首度曝光，正式向親友傳遞幸福喜訊。
原來婚訊曝光有段小插曲，兩人前日才派帖給好友，喜帖昨日竟流出，打亂了一對準新人的陣腳。準新娘莊思明接受本報獨家訪問時難掩待嫁的喜悅，開心表示：「媽咪好開心！但近日真係好忙，忙拍劇，好多嘢要處理，多謝大家祝福。我哋會喺吉隆坡搞小婚禮先，其實冇諗過張帖流出去，遲啲應該喺香港再搞婚禮，但未決定幾時！」談到吉隆坡的婚禮，她說：「我哋應該唔會搞兄弟姊妹團，因為好多嘢搞，好麻煩，我哋好即興決定，冇刻意放低工作。今次都係請相熟嘅朋友，唔係好多人過吉隆坡，都係最熟嗰啲！」
誓減肥做Fit爆新郎
準新郎楊明亦難掩興奮之情：「尋晚先落實婚禮地點，張帖一早有大櫳，知道地點就加上去，再Send畀朋友。婚照暫時都係我哋上次香港影嗰輯，會安排喺香港同內地再影多兩輯婚照，馬來西亞都會再影。其他嘢一路預備緊，突然爆出嚟，好多嘢都唔係預計之內。」對於婚禮日期愈來愈近，楊明為了以最佳狀態示人已開始積極減磅，誓以當年巔峰狀態見人：「我依家積極減緊肥，會回復當年身形結婚，仲有兩個月時間，不過要安排其他嘢，時間唔太充足，希望順利！」
莊思明和楊明對婚事一絲不苟，對請帖的要求亦十分高和講究，從已曝光的請帖可見，設計盡顯心思與奢華感，採用了高雅色調與精緻字體，當中點綴閃爍的金色光點，營造出夢幻的璀璨夜空感。喜帖中央印有兩人的華麗婚照，楊明深情攬實未婚妻的纖腰，眼神盡顯寵溺；莊思明則一臉甜笑。
婚訊曝光後，圈中人紛紛送祝福，作為閨密的關嘉敏昨日出席活動時，直言替思明感開心，祝願對方連生貴子、三年抱兩，並透露獲邀出席婚禮：「佢之前傳訊息畀我，叫我留日期畀佢，話帶我去吉隆坡，當時冇問佢係咩事，之後先同我講佢結婚，我開心到成晚瞓唔着！真係戥佢好開心，怕佢結婚當日我會喊！（你會唔會做姊妹？）我唔係可靠嘅姊妹，嚟緊有工作，所以未必可以幫手籌備，但如果佢出聲，我一定會盡量幫忙。」
莊思敏大讚準妹夫有擔帶
莊思明的姊姊莊思敏對準妹夫楊明讚口不絕：「佢哋相處愈來愈好，楊明不嬲有擔帶，好照顧屋企同我個妹，所以我都好放心，都拍咗拖咁耐，佢哋相處好好，絕對冇問題！」問思明是否想趁早生B？莊思敏表示以她所知阿妹應該不心急做媽咪，她又表示自己會隨時候命，等候思明安排工作，到時會幫手招呼朋友和家人：「希望佢哋開開心心，到時大家飛過去玩得開心，一家人辦喜事係開心事！」
而思明的孖生家姐莊思華亦自揭好事近：「自己都快結婚，不過一年不能嫁兩女，惟有逐個嚟（會唔會做伴娘？）真係唔知，等佢哋安心安排好先，大家都忙！」
楊茜堯忙拍劇 等飲香港嗰餐
楊明跟視后楊茜堯、林峯、張美妮、徐榮、趙永洪都是無綫第13期訓練班的同學，28年來他們雖然各有發展，但感情不變，經常都會聚會，去年更拉隊齊齊坐頭排撐林峯的演唱會。而楊明8月在吉隆坡舉行婚禮，他當然有邀請一眾「老友」到場見證，他受訪時謂：「13期訓練班同學一定有請，美妮已經覆咗會出席，而阿怡（楊茜堯）同阿峯一個要入組開劇，一個拍緊電影，佢哋都要度期先。」
而楊茜堯昨日接受本報訪問時謂：「佢有邀請我呀！不過因為我要開《模範律師團》，要返深圳拍攝，所以去唔到，我都覺得好可惜，不過唔緊要，佢哋之後返嚟香港再搞，點忙都好，我都會抽時間去賀吓，好戥阿楊開心呀！」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
